娛圈單打︱長者交友要小心　以免騙財又傷身

吓，唔係啩，家燕姐被嫩口男友欺騙兩億身家？75歲嘅薛家燕老當益壯，非常精靈，可惜事業有成，感情卻一直落空。直到2018年認識細17歲男友Andy，終於唔使再形單影隻。點知近日傳出，家燕姐遇人不淑，呢位Andy哥原來係騙子！唔係咁爆啩？哦，好彩係流料咋！

近日網上傳得沸沸揚揚，話家燕姐被Andy呃去兩億身家，人財兩空。本來家燕姐只當笑話一則，出席活動時否認吓就算，強調冇咁多身家畀人呃。不料傳聞愈演愈烈，搞到家燕姐要嚴詞否認！發聲明指傳聞純屬虛構，憑空創作，只為博取流量及點擊率！

好咯，家燕姐正式否認，怕且傳聞終於可以停止，朋友同粉絲唔使咁擔心嘞。之但係，空穴來風，亦同社會風氣不靖有關。大家都知，近年有幾咁多網上情緣騙案，以至被真人騙財騙色嘅事件吖。就算做人不嬲精明，但情關偏偏闖不過。尤其年紀漸大，身邊無伴，就好容易被別有用心之人乘虛而入。

講起嚟，家燕姐的確情路崎嶇。佢1984年下嫁越南華僑石保慶，婚姻只維持7年就失敗收場，對方仲拋妻棄仔女，家燕姐惟有復出幕前，獨力養大兩女一子。天道酬勤，家燕姐甫復出即大受歡迎，仲造就「好姨」經典一角。

其事業瓣數多多，拍劇拍電影出歌，更開學校收生教學，賺個盆滿缽滿，身家億億聲不足為奇。認識Andy後，雙方曾經歷離合，最終覺得開心一齊最重要。如果男方用咁長時間騙財，咁就真係傷到入肉、防不勝防咯，幸好只係老作。之但係，老人家交友真係要小心呀！

東網網站 : https://on.cc/東網Facebook專頁 : https://www.facebook.com/onccnews/