曾展望入行6年冇錢畀家用　因1粒糖情傾葉蒨文

GM提到父親在他16歲時急病離世，他感激母親多年來肩負養育他及妹妹成長的重擔，且從沒阻撓他入娛樂圈。GM尚未從理大畢業就已經客串主持J2《#後生仔傾吓偈》，並於2019年畢業時放棄會計師高薪厚職「瞓身」殺入娛樂圈，他坦言：「畢業前諗住玩吓，但試咗呢行好鍾意。由細到大媽咪畀我自由度好大，到我畢業後一段日子，佢問我仲係咪做緊電視，我就知佢擔心。其實我一直逃避，唔知點講。」

他指畢業六年來必需一邊兼職一邊追夢：「一定要兼職，自己鍾意就自己捱囉。唔會要屋企幫，因為唔想媽咪更擔心。但有時佢sense到，譬如佢見到我響屋企經常煮麵食，就會問：『點解啲麵無得咁快？係唔係唔夠錢洗呀？』我又會逃避，話OK無問題，答我只鍾意食呢隻麵啫！」他亦坦承大學畢業至今，收入仍不足以月付穩定家用：「係呀！唔係經常畀到家用，我亦覺得自己對唔住媽咪。妹妹仲讀緊大學，但因為自己追夢幫唔到屋企。」原來GM曾承諾母親假若他28歲未有成績便轉行，巧合地今年28歲的他遇上配對真人騷，他說：「完全估唔到咁多人鍾意睇我追女仔。」

談及與Sophie的淵源，GM指早於2021年拍攝綜藝《不能只有我看到的便利店女食譜》時已有合作，問到最初對女神的印象，他說：「只係幾靚幾funny，無諗過追佢。以前我都無主動追過女仔，都係由朋友相處或者大家有好感開始。」他稱過往有過4段戀情，對上一段關係則是參加配對騷前約8個月，講到分手原因，他表示：「係因為去到某個歲數，大家要嘅嘢唔同。我追緊夢，但對方想穩定啲，明嘅。大家傾分手，唔會去到好難睇嘅，但我係好唔開心。」

去年於處境劇被安排與Sophie組成CP，適逢GM失戀不久，被問及是否因為對方的港姐美貌令他日久生情，GM否認：「從來做嘢都無諗太多，佢最吸引我唔係外形，公司男男女女好多都好靚。佢吸引我第一，係好幽默好搞笑，同佢外表反差好大；其次，佢好有主見同自己諗法，令我幾欣賞佢。」促使GM觸電一刻，他首揭是自己失意時對方的1粒糖：「有1個moment我好記得，舊年七月我自己有啲嘢好唔開心，我好少表達畀人知，但佢觀察情緒能力幾強。嗰日化完妝，佢請我飲咗杯咖啡，上面有粒糖，佢劇入面嘅名叫Candy嘛。我即刻覺得『嘩！』係好有人支持嘅感覺，係嗒晒糖，𦧺嘢！」他重申參與真人騷前，事前不曾對Sophie表示任何好感，及至節目招募男參賽者才觸發了他報名的衝動：「係一直對佢有好感，嗰晚夜闌人靜有啲emo，見到宣傳片，唔想睇住佢畀人追，無理由我唔可以追掛？咪試吓囉。」被問相比其他條件優厚的對手，GM不認為自己是高攀，他豪言說：「我無諗夠唔夠實力同人比，我只會做好自己！我唔會呃佢依家我好掂，會坦白講我依家咁嘅情況，但我一定會努力，話畀對方聽，我一定得嘅，睇對方O唔OK囉！我相信好多女仔都唔係咁現實嘅，都係睇感覺同價值觀夾唔夾。抱住呢個心態，咪勇敢追囉！」至於認識年長他五年的葉蒨文後，GM更發現自己更適合姊弟戀，「以前未試過，依家鍾意姐姐嘅原因，係會發現佢傾偈會畀到啲其他角度你，係自己從來無諗過；有時，佢又會好似妹妹咁樣，感覺有好多面向，係好好！」

東網網站 : https://on.cc/東網Facebook專頁 : https://www.facebook.com/onccnews/