東方日報C1：《女神》帶挈大把人追　羅毓儀認拖林俊其：未一齊！

「童顏女神」羅毓儀（Yuki）與藝人林俊其在無綫戀綜《女神配對計劃》早被視為一對，兩人近日被撞破在鬧市牽手拍拖，Yuki坦承此事，但強調尚未交往，並指若配對成功定必公開，閃盲全世界！她又爆節目催旺姻緣，不乏圈外追求者，桃花遍地開花！

無綫戀綜《女神配對計劃》近期熱播，節目中多對男女成為焦點，近日羅毓儀與林俊其（Kris）更被目擊在旺角街頭手拖手！網民將相片放上網，並以「旺角碰到女神配對計劃Yuki同Kris拖手」為標題，引來熱議。雖然僅拍到背影，但該網民聲稱見到正面，肯定男方是Kris，但女方戴口罩不太確定。其他網民即時柯南上身，有人指女生的鞋及手袋與Yuki用過的一模一樣，從而斷定是她本人。

本報就此聯絡Yuki，她坦承是相中人：「當日開工開咗好多個鐘，咁啱Kris都有返公司，收工就出咗去食飯，自從Camping後，我哋私下都有見面。」講到拖手，她解釋：「嗰個位要過馬路，Kris好紳士咁拉住我過，佢平時都好照顧我，但過完佢冇特別放手，我又唔知點好，不過過咗陣，佢同我講『唔好意思』然後放開咗，我諗佢可能都怕我介意，因為始終我哋又未一齊。」

隔絕圈外追求者

雖然Yuki強調兩人尚未交往，但早前她接受本報專訪，不諱言參與《女神》的初衷是找到戀愛對象，揚言若配對成功必定光明正大拍拖，誓要閃盲全世界！除了節目中的男嘉賓外，她自爆連圈外久未聯絡的異性朋友也主動向她示好，令她大感神奇：「可能我行緊桃花運，感覺係遍地開花咁。」但為免節外生枝，她對節目以外的追求者暫時保持距離。

愛情得意以外，Yuki亦感激節目令她走出事業低谷：「《臥底嬌娃》去年底煞科，之後一直冇劇拍，工作上有啲沉寂，個人好迷惘，加上同男友分手，感覺好似孤軍作戰咁，連想去旅行都搵唔到朋友陪我。依家節目出街後好有回響，反應遠超預期，社交網粉絲人數即時升咗兩萬幾。」原來今次有幸參與節目，全靠好姊妹陳瀅牽線：「我當時同佢食緊飯，節目監製打電話邀請佢參加，我聽到就同佢講『我想玩』，佢好好人，即時幫我拍片，又錄音同監製講。」

遭舊愛「用完即棄」

談到以往的戀愛經歷，Yuki自爆遇過「用完即棄男」及「控制狂」：「有個男仔一開始對我好好，但好快就變得冷淡，經常人間蒸發，短訊又已讀不回，但佢唔想做衰人，唔會主動講分手，想令你頂唔順分手，我哋只係拍咗幾個月，好似畀人用完即棄咁！」另一個則是讀書時的男友：「佢年紀大過我，一定要接我放學，又限制我同邊啲同學玩。初時好甜蜜，後來覺得佢好似怪怪哋，我同佢傾過話想要啲私人空間，唔想冇晒朋友，但佢唔係好接受，我覺得好辛苦，最後都係分手。」她期望透過節目找到真正合適的對象，展開新戀情。

另外，今天播出的《女神》中，Kris突變主動使出「求愛5招」冧到Yuki變「腰果眼」；成功跟女神同房的他，又施以「蠟筆小生眼神」要求同床，令女方最終屈服。

更多新聞，請瀏覽東方日報網頁：

https://orientaldaily.on.cc

東網網站 : https://on.cc/東網Facebook專頁 : https://www.facebook.com/onccnews/