舞台劇獎失資助再自籌舉行　梁祖堯封帝：冇嘢阻到我哋

「第33屆香港舞台劇獎頒獎禮」昨晚（4月28日）於灣仔碼頭一間餐廳自資舉行。香港戲劇協會（劇協）連續第二年未獲藝發局資助及康文署場地支持，需自籌經費並透過出售40周年紀念品籌款。由於場地座位有限，頒獎禮只能邀請候選者及相關團體代表出席；為讓廣大劇迷同樣能夠參與見證，活動一如以往設有網上直播，與所有關心香港劇壇的朋友，一同分享每一份努力與喜悅。

昨晚一共頒發26個獎項。頒獎禮甫開始，會長馮祿德便高呼：「The Show Must Go On！」。他表示，早前在設計紀念品時，特別搜集一些戲行用語，希望印在書簽上。最終找到這句金句，覺得既有代表性，又深刻反映戲劇人的精神，於是將「The Show Must Go On」定為今屆舞台劇獎的主題。

風車草劇團憑《Di-Dar》奪得7項大獎成為大贏家，包括最佳製作、年度優秀製作、最佳男主角（喜劇／鬧劇）梁祖堯、最佳女主角（喜劇／鬧劇）邵美君、最佳男配角（喜劇／鬧劇）葛民輝、以及最佳音響設計-陳詠杰及最佳填詞-晴天林。梁仲恆亦憑風車草劇團的《餐廳》奪取首個最佳男配角（悲劇／ 正劇）獎項。

梁祖堯奪得最佳男主角（喜劇／鬧劇）獎項予《Di-Dar》，他激動表示：「今日我可以代表好多人講心聲——無論有冇被提名，每一位都係好開心，因為我哋真係好愛呢個行業。我哋行過好多好多困難嘅路，但我哋會堅持落去，冇嘢可以阻到我哋！」他再次強調：「冇嘢阻到我哋！」梁祖堯續指，無論如何都會努力講好想講的故事，並以自己賺回來的智慧，繼續熱愛這城市、熱愛身邊的人。

蘇玉華憑獨腳戲《完美證供》奪得最佳女主角（悲劇／正劇），她在台上感謝導演潘燦良：「佢係我嘅導演，亦都係我老公。當我知道佢要做呢部戲嘅導演時，我心諗：呢鋪真係攞婚姻作賭注。排練過程中，我哋係刀光劍影，好多『互片』時刻。但最終我發現，原來我哋可以有更大嘅包容同愛護，喺戲劇之名下，去共同完成呢份創作。我好多謝你，如果冇你，我係冇可能完成呢個『不可能的任務』。」她亦感謝劇協仝人：「呢個頒獎禮，一定要繼續搞落去！」並鼓勵大家要繼續努力，灌溉香港戲劇的土壤，讓下一代、再下一代，走出更出色的道路。

邵美君奪得最佳女主角（喜劇／鬧劇）獎項予《Di-Dar》，她上台時笑言，自己一把年紀攞獎仍然十分緊張：「我相信我哋嘅同行會繼續守護呢塊土地，令我哋繼續成長，令人睇到我哋用心同智慧去分享每一個故事。」。鄧偉傑憑《六號病房》奪得最佳男主角（悲劇／正劇），他特別感謝兩位小朋友，並寄望劇壇能繼續發光發熱。梁仲恆憑風車草劇團的《餐廳》奪取首個最佳男配角（ 悲劇／ 正劇）獎項，他領獎時興奮大呼：「我恨咗好耐喇！」。

壓軸大獎——最佳製作，由風車草劇團憑《Di-Dar》奪得。梁祖堯代表上台致謝，他表示：「好多謝每一位同業，我哋一定要互相支持落去。因為我哋都有同一個理想——要將真、善、美，在劇場上發揚光大。」他感慨地指，世界不快樂，而創作喜劇讓大家開心並不容易，需要厚臉皮和極大勇氣，但他們仍然會努力嘗試。最後，他以風車草每次謝幕時的話語寄語大家：「希望大家會繼續支持香港嘅舞台劇作品，只要你哋繼續支持，我哋就會繼續講我哋應該講嘅故事。多謝各位！」。