陳凱詠被爆拍MV壓榨工作人員　直踩37個半鐘終親自澄清

歌手陳凱詠（Jace）與環球唱片完約後恢復自由身，以獨立歌手身份自資出歌，成績相當不錯，近日又再忙於籌備新歌MV，不過卻有網民公開Jace團隊的拍攝時間表，指出當中須直踩37個半鐘的安排非常離譜，直指Jace壓搾幕後工作人員，如同制度性暴力，更標籤了Jace的帳號，不過之後被其他網民反駁「計錯數」，Jace好朋友、金馬影后鍾雪瑩亦親自留言。

有網民昨晚（16日）在社交平台留言，指見到某香港歌手開工開到「3730」，即拍攝團隊連續工作37個半鐘，認為此做法「係冇把員工、freelancer、crew當人」，又標籤兼留言指責疑似事主Jace：「你可以為夢想搏命，但你冇資格要人幫你一齊去死。創作應該係共鳴，不應該係共傷。」之後有其他網民留言指出樓出計算錯誤，「37:30」是指開工至翌日凌晨01:30，另一個自稱「呢個job嘅producer」的帳號則留言解釋，預計由開工到收工僅14小時30分鐘，絕非樓主所指的非人行程。

Jace好友鍾雪瑩亦特別解話：「無啲咁嘅事，成個拍攝都係十幾個鐘完成哦～頂盡都是廿頭～仲有冇嘢要問？不過我一陣可能唔得閒答了，答到呢度咁上下啦。Thank you 你為我的朋友造新聞，很感動！你都話獨立歌手冇乜錢，嗚嗚，宣傳也很艱難的，而家見到啲飛機越來越多好開心！」吸引大批網民留言力撐。而Jace本人今日下午終留言回應事件，澄清網上流傳超長工時純屬誤會，她透露是次MV拍攝最後只花了14小時，算是提早收工，但仍直認行內有工時過長問題，Jace亦表示認同網民所指創作應該是共鳴，不應該是共傷，呼籲大家繼續共同學習努力建立屬於彼此的社群，相當大方。