恐怖懸疑新片《凶器》逐層揭曉兒童集體失蹤之謎

凌晨2時17分，美國小鎮中的17個小學生同時自行離開寓所，奔向黑暗，集體失蹤，而他們都來自同一班。這就是恐怖懸疑新片《凶器》（Weapons）的劇情背景。電影分為不同角色主導的章節，包括老師、家長、警察、吸毒者、校長與學生，多角度講述環環相扣的事件，逐層揭曉兒童集體失蹤之謎的真相，有詭異心寒、有暴力血腥、更有黑色幽默。

一班主要演員佐斯布連（Josh Brolin）、Julia Garner、Alden Ehrenreich與Benedict Wong剛好都參演過漫威電影宇宙，而身兼編劇導演監製的Zach Cregger是喜劇出身，今次是他繼2022年初導恐怖片《Barbarian》後再執導的同一類型，大受好評，其後他將重拍《生化危機》（Resident Evil）電影。

原來佐斯布連角色本來屬意《神奇4俠：英雄第一步》（The Fantastic Four: First Steps）的Pedro Pascal，而佐斯談到「執二攤」時亦考慮再三：「我諗我純粹係一個懷疑論者。過去廿年只有好少情況，例如拍高安兄弟（Coen Brothers）導演或者Denis Villeneuve嘅戲，你會即刻接，好似佢哋問：『喂你想唔想拍《沙丘瀚戰》（Dune）？我哋可以傳個劇本你睇。』我未睇就應承咗，你知一定掂。而（《凶器》導演）Zach之前拍咗一套戲，我知有人辭演呢部，之後佢哋搵我，問我睇唔睇劇本。我畀個劇本設計吸引住，佢係好精明嘅設計。喺一個好表面化嘅類型之中，佢係一個好聰明嘅劇本。我諗最近好多人拍好恐怖片都混合咗好多元素，例如《訪 ‧ 嚇》（Get Out）同《罪人們》（Sinners）等等。我諗都係時機，我唔認為佢哋有互相影響，點樣抄嚟抄去法。我認為Zach係好獨特，好有情感嘅人，佢利用恐怖類型去做到佢想做嘅嘢，又利用自己喜劇背景，融入嗰啲元素。所以呢套片係為一個本來已經好悶好重複嘅類型帶來新意。」

東網網站 : https://on.cc/東網Facebook專頁 : https://www.facebook.com/onccnews/