網上熱話｜中年漢醉倒輕鐵 鄰座後生仔借膊頭瞓覺 網民：大叔的愛

你曾在公共交通被鄰座陌生人靠著睡覺嗎？一名年輕男網民早前坐輕鐵期間，被鄰座一名陌生中年漢疑不勝酒力醉倒「借膊頭」瞓覺，惟樓主未有拍醒對方之餘更准許對方休息，帖文及圖片引發網民熱議，笑稱「大叔的愛」、「唔係靚女你都ok?好有愛呀！」。

該名年輕男網民昨日於社交平台Threads發帖，他當時坐輕鐵615綫時自拍，旁邊有一名「面紅紅」中年漢「成浸酒味」借其肩膀小睡，帖文寫道「叔叔，見攰就唞啦」。樓主稱「阿叔醉左，突然好順勢咁捱咗落我度，但係我又唔識出聲，直到我落車」，又指「最後我到站我嗌醒咗佢」、「佢醒咗之後係咁同我講唔好意思，然後我哋一齊落車，有八成係搭個龍」、「我係覺得阿叔好搞笑先影低啫」。

帖文及圖片引發網民熱議，笑稱「愛上你」、「下次係咁郁個膞頭，佢就會醒，或者拍拍佢，除非你鐘意大叔的愛」、「應該要攬一攬比啲安全感佢」、「佢酒醉三分醒」、「好sweet祝你哋白頭到老」、「叔叔緊張到紅都面埋」、「挨返落佢頭一齊瞓嘛」、「你真係好人」、「唔係靚女你都ok?好有愛呀！」、「講故事氹佢瞓囉，橫掂都係」。亦有人笑言「好彩係冇嘔到」、「係咪你老竇嚟㗎」、「我第一眼睇到仲以為做咩呢對父子咁溫馨」，亦有人扮大叔留言稱「唔好意思瞓耐咗」。

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)