娛圈單打︱放飛自我大發福　再咁落去唔使撈

中國跳水選手兼巴黎奧運金牌得主、現年18歲嘅全紅嬋，一直係全國焦點。出訪香港期間亦大受歡迎，皆因呢位小妹妹跳水實力高超，「水花消失術」令人嘆為觀止，加上親切傻大姐性格，更加討人歡心，名聲絕對不在師姐伏明霞、郭晶晶之下。

之但係，少年得志，就算不至於語無倫次，亦難免心散。今年嬋妹已因為腳腕舊患復發，以及腰部勞損，退出5月舉行嘅全國跳水冠軍賽及新加坡游泳世錦賽，顯然不在狀態。豈料近期復操，身形竟然暴脹幾個碼，肥過電單車，麒麟臂、水桶腰、甲組腳乍現，甚至有指其發福程度，連捲腹訓練都無法完成，非常大鑊。

嗱，有跳水隊前輩幫嬋妹緩頰，話唔少運動員因為受傷停賽，體形難以維持在最好狀態，相信慢慢投入訓練後，情況就會好轉。反而擔心嬋妹會因為輿論壓力及後輩競爭，影響心理質素。

喂，真係唔知關唔關事嘞，嬋妹可能唔似得伏明霞、郭晶晶咁靚女，因而對外貌並不着緊，放飛自我，狂食狂玩，失去身材管理意識，搞到今時今日大走樣。唔少網民就覺得好可惜囉，嬋妹咁青春，理應有排稱霸世界，偏偏家陣搞成咁，再唔勤力操Fit自己，唔使撈都似。

咁又係呀，國家人才濟濟，長江後浪推前浪，大把後輩平輩對嬋妹位置虎視眈眈，咪以為國家冇咗你唔得呀。好似隊友陳芋汐吖，日前先至喺游泳世錦賽女子10米跳台項目奪金。事實上，嬋妹攞完奧運金牌後，已被網民批評疏於訓練，反而滿身名牌，成日掛住Shopping不務正業，似乎被名利沖昏了頭腦。

東網網站 : https://on.cc/東網Facebook專頁 : https://www.facebook.com/onccnews/