羅家英自爆患癌性慾全失　醫生指還有8、9年壽命

78歲的羅家英早前受訪時提到自己第四度患癌，更表示選擇不接受治療。而早前她就接受好友查小欣訪問，當中提到自己並非放鬆治療，只是用另一種方法，改以注射女性荷爾蒙針及服藥控制病情，並提到已經4、5年沒有性慾，醫生評估他還有8至9年壽命。

羅家英在訪問中解釋今次患癌和以前不同：「我唔係唔醫，佢呢就唔係咁樣醫法嘅。我就去檢查咗，用嗰個同位素就照到我腹腔盤腔呢，有一點點一點點咁樣，得10粒8粒。」而以前曾患肝癌，腫瘤就有「荔枝」般大小。之後到2014年，發現肝臟另一地方又有腫瘤：「14年就係呢邊，又嚟多個荔枝，又喺度，唔係復發，係另外一個地方再生多粒。」而到2019年，發現前列腺組織有癌細胞：「咁前列腺呢就係切除咗喇，切除晒前列腺喇，驗過報告都係冇嘢嘅，點知呢佢有啲嘢潛伏咗喺邊邊，係未曾成形嘅，佢自己慢慢成形，到而家佢成咗形喇，咁先知道。但佢有成咁多粒喺度，係切唔到啦，你都唔知點醫，醫生話得一個方法，就係打女性荷爾蒙。」

羅家英指醫生估計他遇有約8年左右壽命：「唔係消滅佢，唔係醫治佢，等佢平和，但8年之後就壓唔住㗎喇。咁壓唔住要點呀，就要電療同化療。既然咁樣喇，我今年79歲，8年之後我都八十幾啦，電療化療之後，你畀多三年我呀，咁我嗰時都人唔人鬼唔鬼啦。」他更笑指決定在這8、9年間要盡情吃喝玩樂。
注射女性荷爾蒙壓制癌細胞，亦有令他身體出現變化：「個人弱咗，好容易眼瞓，好攰，好唔鍾意講嘢，真係好唔鍾意被訪問，因為訪問不停講嘢。」亦提到已經沒有性慾：「前列腺切除咗之後呢，我個人定咗，淡咗，對於嗰個色字，係喇，冇呀，仲打埋女性荷爾蒙添，更加冇，慣咗，已經4、5年。」