GM畢業後邊兼職邊追夢 感激媽咪給予自由度 認收入未夠畀家用

今年底才滿28歲的曾展望（GM），7年前尚未從理大畢業，就已經客串主持無綫J2《#後生仔傾吓偈》，並於2019年畢業時放棄會計師高薪厚職，「瞓身」殺入娛樂圈。

GM接受商台《星光背後》訪問，自認追女仔輸得起的他，6年來抱著年輕輸得起的精神入行，談及收入常不夠支付家用，GM坦言：「覺得自己對唔住媽咪！」

葵涌區成長的GM，16歲時父親急病離世。他坦言感激母親多年來，肩負養育他及妹妹成長的重擔。他指畢業前後，母親從沒阻撓他入娛樂圈，他說：「畢業前諗住玩下，但試咗呢行好鍾意。由細到大媽咪畀我自由度好大，到我畢業後一段日子，佢問我仲係咪做緊電視，我就知佢擔心。其實我一直逃避，唔知點講。」

GM指畢業6年來，必需邊兼職邊追夢，「一定要兼職，自己鍾意就自己捱囉。唔會要屋企幫，唔想媽咪更擔心。但有時佢sense到，比如佢見到我喺屋企經常煮麵食，就會問：『點解啲麵無得咁快？係唔係唔夠錢使呀？』我又會逃避，話OK無問題，答我只鍾意食呢隻麵啫！」

他亦坦承大學畢業至今，收入仍不足以月付穩定家用，「係呀！唔係經常畀到家用，我亦覺得自己對唔住媽咪。妹妹仲讀緊大學，但因為自己追夢幫唔到屋企。」GM曾承諾母親假若他28歲未有成績便轉行，巧合地28歲前遇上配對真人騷，他說：「完全估唔到咁多人鍾意睇我追女仔。」

（即時娛樂）