GM曾有4段戀情 情傾葉蒨文因為一粒糖 自認適合姊弟戀

年底才滿28歲的曾展望（GM），2019年畢業時放棄會計師高薪厚職，「瞓身」殺入娛樂圈。憑參與真人騷《女神配對計劃》力追處境劇拍檔——2016年港姐葉蒨文（Sophie）而人氣急升，GM接受商台《星光背後》訪問，談及與葉蒨文的淵源，GM指早於2021年拍攝綜藝《不能只有我看到的便利店女食譜》時已有合作。

談及最初對女神的印象，他說：「只係幾靚幾funny，無諗過追佢。以前我都無主動追過女仔，都係由朋友相處，或者大家有好感開始。」

他坦承過往有過4段戀情，對上一段關係則是參加配對騷前約8個月，談及分手原因，他說：「係因為去到某個歲數，大家要嘅嘢唔同。我追緊夢，但對方想穩定啲，明嘅。大家傾分手，唔會去到好難睇嘅，但我係好唔開心。」

去年於處境劇被安排與葉蒨文組成CP，適逢GM失戀不久，被問及是否因為對方的港姐美貌，令他日久生情，GM說：「從來做嘢都冇諗太多，佢最吸引我唔係外形，公司男男女女好多都好靚。佢吸引我第一，係好幽默好搞笑，同佢外表反差好大；其次，佢好有主見同自己諗法，令我幾欣賞佢。」

促使GM觸電一刻，他首揭是自己失意時對方的一粒糖，他說：「有一個moment我好記得，舊年7月我有啲嘢好唔開心，我好少表達畀人知，但佢觀察情緒能力幾強。嗰日化完妝，佢請我飲咗杯咖啡，上面有粒糖，佢劇入面嘅名叫Candy嘛。我即刻覺得『嘩！』係好有人支持嘅感覺，係嗒晒糖！」

他重申參與真人騷前，節目招募男參賽者，才觸發了他報名的衝動，他說：「係一直對佢有好感，嗰晚夜闌人靜有啲emo，見到promo唔想睇住佢畀人追，無理由我唔可以追啩？咪試吓囉。」

被問相比其他條件優厚的對手，GM不認為自己是高攀，他豪言說：「我冇諗夠唔夠實力同人比，我只會做好自己！我唔會呃佢𠵱家我好掂，會坦白講我𠵱家咁嘅情况，但我一定會努力，話畀對方聽，我一定得嘅，睇對方OK唔OK囉！我相信好多女仔都唔係咁現實，都係睇感覺同價值觀夾唔夾。抱住呢個心態，咪勇敢追囉！」

至於認識年長他5年的葉蒨文後，GM發現自己適合姊弟戀，他說：「以前未試過，𠵱家鍾意姐姐嘅原因，係會發現佢傾偈會畀到啲其他角度你，係自己從來冇諗過；有時佢又會好似妹妹咁樣，感覺有好多面向，係好好！」

（即時娛樂）