許冠文受特朗普啟發 有意再寫劇本 衛詩雅傷口仍發炎 需服抗生素

許冠文、衛詩雅、朱栢康、梁雍婷及導演陳茂賢，今天（2日）到銅鑼灣出席何妙祺導演主持的《劇本的年代— 文字一想像一影像》講座，與一班電影人及觀眾重溫配上劇本文字的電影《破‧地獄》片段，分享編劇及演出點滴，當中更送驚喜播出一段衛詩雅與朱栢康被刪剪的對手戲。

多年沒有當編劇的許冠文指，最近得到美國總統特朗普啟發，有意再寫劇本，他說：「我覺得呢個人好有趣，演繹佢做喜劇就啱喇，靈感開始嚟喇，如未來我仲演喜劇，希望角色有佢影子，好似好勁，又不知所謂之間，呢個感覺唔係時時有，要尊重呢份感覺，可能3年之後再問我，我完全冇興趣拍特朗普，就係呢個時候睇到世界大勢咁鬼虛偽、咁得人驚，呢隻狐狸真係超晒班。」

許冠文盼下次不是再談《破‧地獄》，而是談新作，他透露陳茂賢寫新劇本，形容只聽了幾句已覺得好勁，正等待原班人馬再合作：「佢有晒我認為現代應該有嘅導演條件，一定會做一啲以前完全未拍過，我都唔敢騷擾他，編劇同導演工作看似很易，仲難過製造原子彈，百幾部電影只得2、3部賣座，但見有很多年輕人到場，我認為香港電影仍很有前途，只要大家定一定神，未來電影會完全唔同晒。」

問是否想再親自操刀寫劇本？他則指這是個夢，自嘲寫了20多年都寫不到好劇本，掉了很多，「未來不知還有幾多年命，如果仲有命，我的夢就是做一部受歡迎又賣座的電影，而觀眾會覺得睇完幾有意思，心情又靚咗，覺得明天會更好。希望能設計一個如特朗普性格的角色，最有時代感的性格就是他，奸奸地得嚟又唔奸得晒，好似好偉大又不知所謂之間，一個咁嘅人領導世界咁先得意，不知是英雄還是奸雄，成件事本身就好喜劇，現實永遠都喜感過想像。」陳茂賢認為也希望快有新作品，指自己拍喜劇出身，新作亦會加入喜劇元素。

衛詩雅表示期待原班人馬合作，早前拍攝網上節目失足弄傷手踭及膝頭，她表示傷口仍在發炎，因傷口位置一行便爆開比較麻煩，正服用抗生素等慢慢埋口，「之後才發覺原來個pat pat瘀晒，所以條腰咁痛，好彩骨冇事。」許冠文即指她最好命，有醫美醫生老公周祉安，任何傷口都不會有痕跡。

（即時娛樂）