全運港將｜孖生姊妹打沙排顯默契 杜詠彤杜詠雯盼殺入8強

ViuTV全新節目《全運港將》逢星期一下午5時30分播放。主持李莉每集訪問不同項目的香港運動員代表，了解他們日常訓練和備戰第十五屆全國運動會近况。

今天（18日）播出一集，邀請由室內排球轉戰沙灘排球的中國香港沙灘排球運動員杜詠彤和杜詠雯兩姊妹。2人曾奪第27屆全港公開沙灘排球錦標賽冠軍，杜詠彤表示，與妹妹拍檔打波時默契更佳：「同佢打得多，我會知佢會有啲咩做到，有啲咩係暫時未做到，我會知道我咁樣升個波出去，佢會點樣處理。」

妹妹杜詠雯就覺得自己沙灘排球年資尚淺，兩者打法不同，現在仍會混淆：「室內排球速度同位置上，都係向住網前進發，但係沙灘排球就唔可以咁做，加上一啲升球技術，其實係好唔同，有時我會唔小心用咗室內排球嘅技巧升球畀家姐。」

今屆全運會香港協辦沙灘排球，比賽將會在維園舉行，杜詠彤坦言期待和緊張：「我以前都試過喺沙咀道打亞洲賽，成個過程係好enjoy﹑好投入。以往出去比賽，我哋會聽到其他地方嘅方言同你講加油，但係喺香港你聽到廣東話，可能同你講一句加油，或者有人嗌你個名，嗰下你會覺得特別有能量，同埋覺得好開心。」

面對內地選手，杜詠彤直指她們身形更高，在速度和節奏上要再加把勁：「因為我哋未必係最大力嘅球員，但係用啲移動性或者節奏嘅進攻，令佢哋穩固防守可以突然有轉變嘅時候，我哋就可以偷到位攞分。」

對於全運會目標，杜詠雯表示希望入到8強：「我哋上年都安排咗好多內地比賽，一直都係打到16進8呢個階段止步，希望嚟緊我哋團隊會有突破，亦希望喺全運會主場上有更好嘅表現，同埋自己付出咗咁多努力，我都希望香港市民會支持同睇到。」

（即時娛樂）