周秀娜自爆斷正男友偷食　攞正牌鬧古天樂嗌爽

古天樂一直秉承着少說話多做事作風，為挑戰同周秀娜上演吵鬧夫妻戲碼，拍攝前主動撩交拗對戲，今次邀來台灣男星劉冠廷坐鎮，首次合作發現劉冠廷說話更少，大為欣賞。面對經濟大環境下行，古天樂坦言不敢放長假，已部署好未來幾年的「抗逆」工作。

由影帝古天樂（古仔）、周秀娜（Chrissie）和金馬最佳男配劉冠廷主演的電影《私家偵探》近日上映，古仔與Chrissie多年合作無間，今次飾演一對感情欠佳的夫妻，多場鬧交戲對古仔可說是大挑戰，古仔表示：「有幾日約佢出嚟鬧交，喺走廊鬧多啲，事先溝通清楚，依家個版本同劇本有啲唔同。（平日少講嘢鬧交覺得難？）我開會成日講嘢嘅，鬧人就少啲，我唔鬧人，畀人鬧都少。」Chrissie笑謂難得的機會「攞正牌」鬧老闆很是開心。古仔就覺得鬧交本來就解決不到問題，只有傷害感情，最近一次鬧人是幾時？他笑說：「就係呢部戲，我平時唔鬧人。」Chrissie亦有同感，覺得鬧交的說話最有殺傷力，通常只會跟最親近的屋企人和男友鬧交，以前好勝鬧交一定要贏，人漸長會先冷靜一下。

電影中涉及出軌的話題，Chrissie就自爆試過另一半出軌遭當場斷正的慘痛經歷，她表示：「親眼撞口撞面睇到，衝上去想知點解。（後尾點？）唔記得啦咁耐，嗰時10幾歲時候。」現實就未試過要請私家偵探去查。

劉冠廷戲中飾演一名殺手，感覺好刺激和興奮，與以前的殺手角色有不一樣的體驗，希望下次可以嘗試演喜劇。提到在馬來西亞開鏡拜神，對切燒豬感覺好新鮮，由於不諳廣東話，初時不敢同工作人員說話，但指古仔給予好多珍貴建議，問古仔發掘到劉冠廷甚麼優點？古仔笑說：「佢比我更少嘢講，係好事，少嘢講會專心做事，比較年青演員佢較少嘢講，可能性格問題，如果多嘢講我會唔知點。（同年輕人有代溝？)有代溝有幾出奇，係佢哋有問題，唔係我有問題，哈哈！」Chrissie就講笑：「我同佢拗交就知冇代溝啦！」

戲中的打戲古仔都親自上陣，自言因為打得多，知道技巧，他覺得香港電影打戲是好重要一環：「香港電影爆炸、飛車、開槍同打人，唔見血唔開心。好似九龍城寨，如果第3集變文戲就唔得嘛！」他直言工作忙碌，已有未來幾年的工作部署，問到會否想放假？他說：「經濟環境唔好，仲放假？」

古天樂

髮型：Dan Tam @O4

化妝：Carman Man

周秀娜

髮型：Keith_wong @ Artify.Lab

化妝：Yannes Lee @ndnco.co

劉冠廷

髮型、化妝：sovenhomuha

場地提供：The Mira Hong Kong

東網網站 : https://on.cc/東網Facebook專頁 : https://www.facebook.com/onccnews/