刑偵12︱張振朗「貨櫃大戰」險中暑：現場好似地獄

由林保怡及張振朗主演的無綫熱播劇《刑偵12》下星期迎來結局周，劇情更見緊張﹗據悉，其中一場戲林保怡飾與7個人格「鬥爭」，為奪回身體主導權要盡快找出每個人格的解離原因並和解，張振朗與傅嘉莉想盡辦法拯救林保怡，卻與其不同人格上演一場「貨櫃大戰」！

這場重頭戲前後拍攝了兩、三天，當時正值夏天，為免影響收音，台前幕後需在完全沒有冷氣，以及密不透風的場地展開追逐及肉搏戰。出名捱得的張振朗拍攝首天更出現疑似中暑狀況，他直指現場「好似地獄」：「超級焗，加上係鐵皮屋，太陽一曬會好似焗爐咁愈嚟愈熱，而我嘅造型係長褲同長身厚軍褸，仲要全程跑嚟跑去、跑嚟跑去。我開頭都仲以為自己頂得順，因為都拍咗咁多年嘢，但拍咗兩個零鐘之後，我仲着住件褸、Feel到自己出咗好多汗、但我就覺得好凍，咁我就知道大鑊喇，但仲有十幾個鐘要拍，冇辦法惟有捱過去。」

他續指拍攝場地較為偏遠，來回酒店需4小時車程，為爭取時間休息，第一次主動要求工作人員幫忙「搬近啲」：「第二日劇組又好快咁作出調動，等演員休息期間可以出外面呼吸吓新鮮空氣。」至於年屆58歲的張松枝，今次拍攝展現了靈活身手，跑速亦絕不輸及後輩張振朗，他表示：「身手都係多年拍攝經驗累積返嚟嘅、平時都有做開帶氧運動同拉筋、不過最緊要都喺我哋嘅武術指導、同埋導演攝影配合、佢哋設計好個動作概念、先有咁好效果。」他直認貨櫃拍攝相當辛苦，每日收工都變「黑色鼻窿」：「好彩保怡有Keep住萬歲，提供冰凍飲品畀大家。」

東網網站 : https://on.cc/東網Facebook專頁 : https://www.facebook.com/onccnews/