俠醫｜丁子朗負責「奸角擔當」劉佩玥做機心女享齊人之福

由陳豪、張曦雯、馬貫東、丁子朗、劉佩玥、譚凱琪、馮皓揚、郭柏妍、游嘉欣、鄭子誠等劇集《俠醫》，將於9月1日起首播。《俠醫》負責搞風搞雨的「奸角擔當」，則為丁子朗（丁丁）及劉佩玥（Moon）。

阿Moon在《俠醫》中演「機心拜金女」沈綺婷（阿Nat），是羅穎琛（張曦雯飾）地產公司同事兼閨密。雖然阿Nat表面對經常甩碌的阿琛照顧周到又體貼，但實質不但經常放阿琛暗箭；表面扮好心的阿Nat，為了錢更暗地搶走阿琛不少生意。

除了是「綠茶婊」，為錢不惜一切的阿Nat，更視自己的完美身材及女性美為生財工具，為了搶到生意、掙到可觀佣金，阿Nat出賣肉體，她先後與劇中演鄧力圖的鄭子誠飾及演鄧世鏗的丁子朗發生關係。

為了令觀眾開劇前對阿Nat有進一步了解，無綫官方社交平台發放預告片，身穿黑色貼身裙的Moon扭動腰肢及撥弄秀髮兼騷長腿，加上迷離眼神，狀態誘人。

談到新劇角色要周旋不同男人之間，當中與「善良暖男」馬貫東及「超級奸仔」丁子朗最多瓜葛；阿Moon以「享盡齊人之福」形容自己，並指自己至少與6個男角色有親密關係：「有丁丁、馬貫東、陳豪、Patrick Sir、鄭子誠，同埋嘉輝哥。」

阿Moon指阿Nat角色很立體，令從演多年的她亦感到演繹時有難度：「首先佢係一個好識得去利用人心嘅女仔，對住唔同人，佢會識得戴唔同面具，爭取對自己最大嘅利益，就算要犧牲色相，都唔係一個問題。而阿Nat變成咁，同佢嘅童年啦同埋成長有好大關係，一個壞人背後故事，都可以好淒慘。可恨之人亦有可憐之處，喺沈綺婷嘅世界入邊好難有愛，因為佢唔相信任何情感，唯有錢先至可以畀到最大安全感佢。

至於丁丁今次演「殺人放火、姦淫擄掠」做齊的超級奸仔，兼且是衣冠禽獸；為了個人利益，就連父親（鄭子誠飾）無面畀兼無情講，為人欠缺同理心，為了利益不擇手段，丁丁受訪時坦言今次這個富二代角色，是「壞人之中的壞人」，還感激編劇「寫到咁多嘢畀我」。

丁丁除了煲勻無綫經典奸角演出偷師外，更在拍攝現場向「無綫十大奸人」之一的鄭子誠請教，丁丁說：「我今次係參照咗好多TVB經典反派演繹嚟做，對我嚟講係好大挑戰同突破，可以話係考牌之作。我都做足好多功課，同睇咗好多唔同嘅電影；希望洗走到觀眾之前覺得丁丁係陽光男孩形象，喺演員路上殺出到條新嘅路。」

丁丁續指與劇中父母鄭子誠及江欣燕是「反派三人組」：「我哋都有唔同嘅奸法，但我係奸得嚟深思熟慮嗰隻。好想多謝兩位前輩，佢哋教識咗我點樣去揣摩見到人哋折墮就開心狀態，呢個係純奸角嘅諗法，都真係幫到我去突破咗個樽口。」

（即時娛樂）