林家謙力拒楊受成邀請簽紉英皇　自爆性格問題：會嘥好多CPU去處理人事

林家謙早前在金像獎奪得「最佳原創電影歌曲」，其後在慶功宴上獲英皇老闆楊受成力邀他加盟，事後引來不少網民熱議，他亦多番澄清二人只是開玩笑。新城知訊台今晚（17日）推出全新音樂節目《One Music Corner壹角樂》，由資深廣播人梁兆輝（Brian）主持，首集嘉賓便是林家謙，他坦言因性格問題拒簽大公司，不太認識如何處理太多人事。

新城邀得曾於1991年擔任新城音樂總監的梁兆輝回歸開咪，他在節目中開始第一句立即笑說：「我希望嚟緊節目順順利利、大吉大利，所以搵咗個喃嘸師上嚟開光作法。」主唱《喃嘸師感官漫遊》的林家謙在旁大讚：「原來你咁有周詳計劃。」

早前在香港電影金像獎頒獎典禮，林家謙憑電影《破‧地獄》主題曲《普渡眾生》首奪「最佳原創電影歌曲」，後來在慶功宴上獲英皇集團老闆楊受成力邀他加盟。被問到有否認真考慮簽公司，林家謙回答：「多多少少係我個人性格，我慣咗或者得心應手啲比較少人嘅團隊，因為我唔係太識控制太多人事，去到一間大公司，都會有架構和不同人事上嘅嘢，但呢啲流程係咪我可以經得起呢？或者適唔適合呢個模式去做呢？我就覺得唔太適合囉，尤其我出道咗5、6年，發覺呢個模式好舒服嘅時候，如果入咗一間好多人嘅公司，我會嘥好多CPU去處理人事，咁我不如將CPU擺喺音樂製作上。」

被問到是否要有某個條件才會考慮簽公司，林家謙反問：「我覺得係咪要咁死？畫條線去簽一個藝人，定係有項目可以合作，如果係項目合作，我係好open，例如啱啱嘅《破‧地獄》，都算係跟娛樂公司去合作做隻歌，如果我真係咁唔open-minded，死都要自己做，人哋都唔會搵我啦！」

林家謙又透露早前巧遇梁詠琪，對方跟她分享廿年前出道的經歷，「佢都覺得廿年前做唔到獨立歌手，一定要有間公司幫你做，要處理好多嘢，我都覺得係，因為廿年前冇咁多社交媒體，你冇得去表達自己，要有人幫你去表達你個人係點，你嘅音樂，要現今呢個年代先有效，我放喺廿年前一定唔可能，咁啱我係呢個時間，用最舒服模式去做，大家又接受。」

節目中有個快問快答環節，原來林家謙擁有的第一張唱片，8歲左右用零用錢購買的張栢芝《Destination》，而他最難忘的電影歌曲或配樂，則是張栢芝的《星語心願》；若流浪荒島只能夠帶一張唱片陪伴自己，林家謙選了陳百強的《不再流淚》；至於若沒有出現一位音樂人，便沒有今天的林家謙的話，他則選了方大同。