娛圈單打︱偽娘化身千人斬　食盡猛男真斗膽

大癲，100歲唔死都有新聞！呢期兩岸最熱爆話題，並唔係乜嘢頂流呀、熱巴呀，而係一名誤傳為60歲、實際係38歲嘅南京偽娘阿紅！呢位仁兄犀利咯，生得牛高馬大，一睇就知係男子漢，居然憑住一頭假髮、一身連身裙、一臉極厚批盪瞞天過海，化身偽娘，成功約炮接近1,700名男子！日本偽娘就話嗒得杯落啫，呢位偽娘點頂呀？

嗱，阿紅認真大膽，唔止約炮咁簡單，仲偷拍整個過程，再將視頻掟上網販售，終於東窗事發被捕。南京公安局話喎，阿紅真人姓焦，涉嫌傳播淫穢物品罪被刑事拘留。當局仲會調查佢有冇性病，若蓄意傳播，最高刑罰係死刑！

兩岸網民將事件定性為「男莖大屠殺」！哇哈，認真慘烈！大家最不解嘅係，以阿紅呢副尊容，唔揼佢一鑊都算畀面啦，點可能仲有下文？網民紛紛對炮友們進行人肉搜尋，赫然發現阿紅功夫真係好到家，炮友只需送上食油、西瓜、小家電等小禮物，就可以免費約炮，當中更不乏外籍俊男、大隻猛男、皮褸型男。有男士食過翻尋味，一年四季老是常出現，問你服未！

網民仲幫呢班炮友改花朵，包括「來都來了哥」，皆因呢位哥仔登門見到阿紅副尊容後，一度滿臉狐疑，問長問短，阿紅竟然背住鏡頭拉高裙子讓對方驗明正身，哥仔終於將就開餐！一場嚟到，食得唔好嘥呀！

最悲催嘅係「皮衣小哥」，佢被踢爆早就有索爆未婚妻，會唔會因此家變，真係講唔埋。女網民則自愧不如，唔明點解阿紅可以食盡好西！更唔明炮友們，點解分唔出阿紅係男人定女人！

東網網站 : https://on.cc/東網Facebook專頁 : https://www.facebook.com/onccnews/