啟德表演賽｜孫興慜出席球迷見面會呻熱 阿Mic索簽名緊張過参加「造星」

【體路專訊】韓國人氣球星孫興慜今（30日）午與4名隊友出席「AlipayHK熱刺球迷見面會」，大派粉絲福利，簽名合照樣樣齊，逾50名Fans滿載而歸，當中獲邀出席的獨立歌手兼KOL 阿Mic（周卓盈）笑言與「孫仔」近距離緊張到口震，惱海一片空白：「仲驚過參加『造星』，好想同佢講嘢，但緊張到乜都諗唔到！」

熱刺球迷見面會安排5名球星出席，包括隊長孫興慜、賓坦古亞（Rodrigo Bentancur）、丹素（Kevin Danso）、羅美路（Cristian Romero）及梁文革。盛傳快將離隊的孫興慜率先向在場球迷問好，兩度表示雖然香港「超熱」，但仍很高興再度東來：「我第一次隨隊來港是 2017年對傑志，今次很開心可以到來，即使天氣十分炎熱，不過希望能夠好好享受，明晚的比賽踢出好表現。」

熱刺球星隨後為超過50名球迷、VIP及藝人KOL簽名及合照，「孫仔」笑容滿面「交足功課」，不時與球迷互動。本身是熱刺「忠炒」的余德丞（Dickson）及《全民造星》出身的獨立歌手阿Mic亦化身小粉絲。昨日熱刺操練時已索取了孫興慜簽名的阿Mic再與這位「韓星」親密接觸，高呼「夢想成真」：「其實噚日見到兩面我已經覺得好好彩，夜晚都瞓唔著，今日可以見到佢哋咁長時間更加開心。本身MC（司儀）叫我諗定多啲嘢同孫興慜講，但我實在太緊張，埋到去個腦完全諗唔到嘢，口都震晒，只係同佢講I’m so nervous（我好緊張），跟住Son（孫興慜）就笑晒口問我Why（點解）？」阿Mic笑言比當年參加《全民造星》及上台表演更緊張。

「見到明星𠴱種夢寐以求嘅感覺原來係會咁興奮，真係畢生難忘，我覺得自己好幸運，雖然我冇任何宗教信仰，但我真係要感謝呢個世界！」本身情迷哈利榮斯（Harry Winks ）的阿Mic表示，「孫仔」在她心目中地位已經跟榮斯平起平坐：「真係好唔捨得佢離開熱刺。」

至於早前親身見證熱刺捧走歐霸盃的余德丞就表示，對明晚首場海外北倫敦「打吡」非常期待：「希望兩隊入多啲波，以和為貴，踢成3比3甚至4比4就最好喇！」

圖：黎永淦

《體路Sportsroad》
屬於香港人的體育新聞平台
Facebook: https://www.facebook.com/Sportsroad/
Instagram: https://www.instagram.com/sportsroad.hk/