馬景濤復刻張無忌直播出事　突然暈倒後腦着地眼神渙散

台灣男星馬景濤於1994版《倚天屠龍記》演張無忌成經典，尋晚（21日）佢於杭州宋城景區以張無忌裝扮進行直播，復刻經典劇情並演唱主題曲，期間又唱又跳，點知唱足約1個鐘後即出事！

約晚上8點，63歲嘅佢突然面色蒼白、眼神渙散，踉蹌後仰倒地，後腦勺撞擊地面發出巨響，直播緊急中斷，工作人員迅速上前救助，現場一片混亂。工作人員將馬景濤扶起時，恢復意識，一手按住頭部。網友指出，佢暈倒前已顯不適，包括緊抓主持人肩膀試圖保持平衡、臉色不佳、全身出汗等，加上杭州當日氣溫高達35℃，馬景濤身穿厚重古裝戲服，長時間唱跳導致脫水或中暑。

合作營運公司及馬景濤所在的天心兄弟工作室回應指，馬景濤經初步診斷因低血糖導致暈倒，目前身體已無大礙。網友發現，馬景濤自6月18日起，已連續4日喺宋城進行高強度演出，包括吊威吔、跳舞及重現「咆哮」片段，即急呼籲關注藝人健康，尤其高齡演員於高溫下嘅工作安全。

東網網站 : https://on.cc/東網Facebook專頁 : https://www.facebook.com/onccnews/