ROVER道盡追夢辛酸　Band仔要堅持自己

樂隊ROVER四位成員卓金樂（Kim）、雷濠權（Jason）、陳鎮亨（亨仔）及王希晉推出今年第2首主打歌《流浪者詩歌》，並齊為新作作曲，歌曲道盡追夢背後的辛酸與迷失。MV以「黑白ROVER」做主題，「暗黑ROVER」要衝破種種掣肘，包括希晉奮力擺脫枷鎖，Jason打斷鼓棍發洩怒火，亨仔爆Seed掟結他，Kim用力撕下假面具，最後蛻變成「純白ROVER」。

希晉直言追夢恍如一場障礙賽，需要衝破別人的目光與批評，他憶述最深刻的一句負評：「最記得喺網上睇到『呢4個𡃁仔永遠都唔會成功！』若然心態唔夠正面，可能一句說話已經令我放棄，唔再追夢，好在我哋一直努力做自己想做嘅嘢。」

Jason同樣遇過激進網友，令他不禁反思現今的網絡生態：「老實講我一向唔係太在意批評，反而會思考點解佢哋會咁講，先自行消化同過濾。不過，有一次的確令我覺得唔舒服，就係有人分享我嘅唱歌片，批評我唱得差，又話邊個唱得比我好，呢啲我唔介意，因為我自知唱歌唔係強項，最奇怪係佢叫我返澳門發展，又批評我以前嘅團隊，根本同我嘅歌藝冇關，所以網友要點評價我都冇所謂，但唔好拖其他人落水！」向來大而化之的亨仔，對待網上留言相對豁達：「初出道時經常會上網睇留言，依家學識唔好理會留言，就算睇到都唔會有太大感覺，只要我能夠做到自己想做嘅嘢就可以。」

批評既是壓力亦是動力，Kim與Jason承諾會不斷自我增值，突破框框，Jason說：「我發現自己對音樂嘅認識太少，所以希望學習更多樂器同唱歌，希望喺創作同演出上都有更好水準。」Kim同樣力求進步：「呢刻面對嘅壓力係永遠覺得自己做得唔夠，我本身唔係太識作詞，最近都嘗試為《公司逼我打籃球》主題曲《Break The Wall》填詞，不停逼自己去挑戰先可以進步，過程中難免有啲迷惘，但人始終唔會突飛猛進，一定要花時間去循序漸進。」

東網網站 : https://on.cc/東網Facebook專頁 : https://www.facebook.com/onccnews/