Edan化身兒登大師傳「祓教」　大講粗口諧音：做乜諗嘢！

人氣男團MIRROR成員呂爵安（Edan）昨晚（16日）起一連3日於亞洲博覽館舉行演唱會，演唱會中，他除了唱歌外，還有棟篤笑環節，期間大講粗口諧音，令全場爆笑！

Edan化身「兒登大師」身穿僧人服登場，自稱是「祓教」話事人，他表示：「有人同兒登大師講你變咗，我出道7年改變好多，例如我影相嘅甫士唔同咗，依家嘅甫士，連我都心動。以前遲到會鞠躬道歉，依家我係唔會再遲到，以前訪問牙肉爆晒出嚟，依家係不苟言笑，但不變嘅係今次同之前一樣都係開3場演唱會，人會變月會圓，但點變都唔會好似Jer塊臉咁圓。」

他續指作為「祓教」要助人祓除煩惱，又謂有個名物叫「祓經」，當中有3條經文：「第一條係『做乜諗嘢』，唔係唔好諗，而係唔好亂諗嘢、諗太多，仲有個變奏版就係『關你諗事』。」他還即場教大家活學活用：「拜年嘅時候姨媽姑姐問你點解仲未結婚，可以講乜呀？」全場大叫：「關你諗事。」他指第2條經文是「來都來了」，並指只要轉念就可唔可以解決煩惱，他不忘自嘲：「例如我以前出歌好犀利，閒閒地有幾百萬、幾千萬點擊，但我前排出新歌《我以為可以》，3個月得30萬點擊，我會諗一定係首歌太傷心，所以大家唔想聽，又例如最近我成日出現喺一個叫難聽歌手俱樂部嘅頻道，我轉念一想，我睇吓其他歌手係Jer，我同佢係同一個歌手俱樂部會員，咁知我咩料啦！近排發現（妹妹）小如豬開工同廣告多過我，佢嘅社交網以前好多同我嘅合照，依家係同Product合照，我轉念一想，妹妹搵到錢，阿哥可以退休，即係今場係尾場喎！」至於第3條，他笑言有待解鎖。

首場Edan邀請了羅家英及馬來西亞創作歌手菲道爾擔任嘉賓，Edan自言很喜歡菲道爾，對方的歌超好聽，自己的歌單大部分是對方的歌，今次有幸邀請菲道爾可算是自肥計劃，兩人合唱《能遇見，就很不錯了》及《友誼長存》。菲道爾透露今次是第2次來香港，今天早上才到，翌日便走，他又邀Edan合作寫歌：「我作曲，你填詞。」Edan卻拒絕謂：「作詞不行，我寫的都係髒話。」並即場教菲道爾講廣東話「祓」，叫他向觀眾大叫「祓你」，菲道爾問他「祓你」是甚麼意思？Edan坦言是髒話，其後急急補充：「有K尾音是髒話，冇K不是，祓是淨化的意思。」菲道爾再問：「是你演唱會主題嗎？」Edan大笑否認：「不是！」

而Edan在Encore環節上亦別出心裁，他突然現身觀眾席通道，他邊唱《LOVERSE》邊跟粉絲互動，跟粉絲自拍又拼心心手勢，他呼籲大家要留在自己的座位上及守秩序免造成混亂，否則之後兩場可能要消取這環節。而另一個彩蛋是他挑選歌迷跟他合唱《漸漸我們》，並一度拖粉絲手唱歌。

除了搞笑外，Edan在演唱會上流露感性一面，尾聲時，Edan換上西裝彈奏鋼琴，跟演奏弦樂的小朋友合作，他表示演唱會主題是關於成長：「面對世界，可能會失去最簡單最美麗最寶貴嘅嘢，希藉演唱會提醒自己同大家保持童真，保持有力量有衝勁嘅心。」他在Encore後又剖白自上次演唱會至今發生很多事：「個天迫我成長、大個、要改變，大家見到有啲，見唔到有更多，身邊好多愛我錫我支持我嘅人，包括在坐每一位對我不離不棄，衷心多謝大家咁愛錫我，咁無條件同咁誇張，我會繼續做自己認為啱嘅事，繼續行我嘅人生路，去探索同摸索，無論未來咩階段、咩難關、挑戰定開心，都希望有你哋我陪住我一齊行，我都會陪住你哋。我會每變得更成熟同好。」

東網網站 : https://on.cc/東網Facebook專頁 : https://www.facebook.com/onccnews/