網上熱話｜巴士無人按鐘不停站遭反駁是「大站」　網民斥車長心地唔好：明知有落都唔停

搭巴士上車要遞手落車要按鐘，是恆之以久的做法兼乘車禮儀。有相信是車長的網民，近日在網上發帖稱「廣福街市唔撳鐘丫啦，全部人載晒去宏福苑落車，再唔撳鐘就車晒你地返火車站」。帖文引來批評指「你冇做錯，但係心地唔好」，認為車長內心明知乘客想落車，卻只因沒有按鐘而不停站「希望佢落唔到車」，進一步引起有關乘客無按鐘應否仍舊停站落客的熱議。

▼疑是車長的網民原帖▼

有留言倡照埋站落客兼提示要按鐘

據發帖者上傳的照片顯示，涉事路線相信為只在周日及公眾假期行走、來往大埔廣福邨及富善邨的九巴71S線。發帖者隨後又補充，因無人按鐘而離站後隨即有乘客斥責「大站嚟，一定要停站」，他隨後回應指不知道何謂「大站」，「總之有撳鐘就有停站。」

帖文在數日內吸引到過千讚好及數百個留言回應，其中有網民直斥涉事車長「心地唔好」，指從行文意會到車長明知道有乘客需要落車，卻純粹因為沒有人按鐘而不停車，「即係你內心明知有人係需要落車，而你希望佢落唔到車。」該網民續說，車長即使沒有做錯也不代表他心地好，就算要教育乘客落車按鐘，「佢可以照埋站開門，並且溫馨提醒佢哋下次記得撳鐘，但係而家佢就選擇咗一個令到乘客不變(便)嘅方法。」

同時，有網民認為71S線主要客源為屋邨長者，「廣東街市都係多人落嘅站，希望下次就算無人撳鐘你都停一停，睇下會唔會有人想落車。道理上你無錯，但我相信你有同理心……用多1-2分鐘埋站應該唔會阻到你時間的。」

▼網民留言回應精選▼

網民教路做多一步免重演

不過，帖文亦有很多網民支持車長做法，「點解會以為有人撳咗自己就可以唔使撳鐘」、「你有需要落車嘅撳一次個鐘好難咩……呢啲係自己嘅個人意識公民責任，憑咩老奉一定要停」、「冇人撳&司機見到個站冇人上咪唔使停直接走，點解會話返個司機雖然冇人撳鐘，但明知嗰個站有人落都唔停車」、「個個都唔撳鐘想奉旨有得落車，咁不如好似地鐵站站等算啦。」有網民就指出乘客只要做多一步都可以避免同類情況，「其實有其他人撳既(嘅)話，車門頂、車頭都會著紅燈，望多一眼都難？」另有人指出，乘客忘記按鐘與「以為有人撳於是自己唔撳」是兩回事，坦言「停畀你係人情，唔好係(喺)度情(緒)勒(索)」。

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)