張潤衡回應方東昇為收視流量「極不尊重」　被引「真相」言論斷章取義

TVB新聞部方東昇團隊製作的節目《真相猜‧情‧尋》自7月21日起播出後餘波未了，最後兩集調查的是1996年2月的八仙嶺山火，這宗慘劇當年導致香港婦女會馮敬堯紀念中學師生5死13傷，節目播出後造成極大迴響，尤其是當年山火的倖存者張潤衡繼續備受爭議，成為中矢之的，近日他亦在網上以千字文回應指控，暗指方東昇偏頗及斷章取義，其後今晚（3日）更表示要暫停回覆所有留言：「原因很簡單 - 我需要在太太回來前晾好衣服……」

《真相猜‧情‧尋》探討4宗香港重大案件，包括1973年李小龍猝死之謎、1999年彭楚盈白骨案、1996年錫安教會雙氧水治病事件，以及1996年八仙嶺山火」。其中後者最後播出，當年12歲的張潤衡於八仙嶺山火中被燒至六成皮膚受傷，他曾於訪問中承認早上集合前曾吸煙，一直被外界認為他是導致山火的罪魁禍首，而節目中亦提到張潤衡原先答應受訪，但最終「甩底」。

張潤衡過去曾經接受媒體專訪時說過：「真相，你搵到又點啫？」這一句令人嘩然，不少網民認為他不知悔改，而《真相猜‧情‧尋》節目尾聲中，主持人特別引用張潤衡的名句，表示：「如果搵到答案，但無汲取教訓，歷史遲早重演，悲劇只會再臨，到時或者會真正應驗一句話：真相，畀你搵到又點呢？」

節目相隔幾日，張潤衡亦在網上以千字文親自回應：「嗰句說話係畀網絡cap圖出嚟斷章取義。我真係唔明啲乜嘢面對傳媒對答問題，我唔係一個受過公關訓練嘅公眾人物。嗰陣時個訪問問我想唔想知道真相，我嗰一刻個腦都好混亂。你想我點答？」他又表明當時也不知道山火情況：「其實我係坐咗喺度玩game boy ，聽到老師叫我走，我就即刻走。我點樣知真相？我都唔知真相，我點樣回答？」

張潤衡又強調自己從來沒有答應接受訪問，「我唔會睇佢呢個節目，呢個節目本身就係出於極唔尊重嘅情況發生。有好多鏡頭以外嘅嘢你哋唔知，正如我從來都冇應承過佢哋接受訪問，佢就夾硬喺個節目度話我應承咗佢。事實係嗰個李嘉嘉（另一節目主持人）一開始打電話俾我，我已經拒絕咗。佢要約我傾幾句，得，我就約咗佢諗住傾幾句。點知佢帶晒成對人過嚟，完全事前冇通知過我。呢啲嘢你哋又知咩？」

至於張潤衡說出「真相」的那句說話，他暗指被後期剪接，原句意思是叫對方查清楚。「佢不停攞呢一句出嚟做soundbite。喺我角度睇，佢哋都係為收視為流量啫。我改變唔到，你哋點睇電視，但係從我角度嚟睇，你哋都係喺嗰幾十分鐘嘅節目入面，就好似覺得自己得到晒所有嘅資訊一樣，其實呢堆節目都係喺一個前提底下（留意番，節目入面班主持所問嘅問題，全部都係引導性㗎啦），令你哋嘅情緒側向一邊咋嘛。」

張潤衡再次強調：「我而家都係保持嗰個諗法㗎，真相？你哋真係想搵真相咩？我都有睇部份嘅留言，全部都係偏頗性嘅，大家只不過想搵個你哋睇唔順眼嘅人你攻擊吓啫。」

直到今晚9時多，張潤衡更新社交網，表示自己要暫停回覆所有留言，表示同事們不停提醒及建議他暫停回應這些留言。「過去大半天，我花了很多時間回覆部分留言，主要是因為一些不實指控已經困擾了我十年，我覺得有必要澄清一些無理和被歪曲的說法。我已經盡力回應了許多問題和留言。」

張潤衡續說：「現在是星期日晚上9:40左右，從這一刻開始，我會暫停回覆所有留言。原因很簡單 - 我需要在太太回來前晾好衣服，而且公司還有一堆工作等著我處理，是時候回到現實生活中的責任了。」他表示自己的工作計劃已經排得爆滿，已安排同事幫忙跟進帖文留言，又指已向同事作出指示，會舉報及封鎖所有帶有冒犯性和滋擾性的留言。