江若琳分享御夫術　有米老公要放養

歌手江若琳（Elanne）將於8月24日假麥花臣舉行演唱會，雖然VIP票價為1,280，其他則是980及680元，但網上預售均於1小時售罄，令她喜出望外，她接受訪問表示：「第一輪優先訂票好快賣晒，再加推另一輪都賣埋，希望公開發售時，銷情一樣咁好啦。」

問到她和前經理人公司的官司完結後，現全力發展事業，可擔心忽略了家人？Elanne自信可照顧好兩隻貓及快將返學的囝囝，不過「生煎包王」老公Oscar就會採取「放養」態度，她說：「我從來都冇乜理他，佢成日打電話嚟問我做緊乜，我都話好忙，立即收線，之前老公都問我可唔可以一星期抽一日同佢過二人世界，我哋就決定逢周五係拍拖日，可以留半日時間同佢睇場戲、食餐飯，佢已經好開心啦。」

談及其老公經常為食肆生意飛抵新加坡，每次逗留達兩周時候以上，問可擔心另一半「曳曳」？Elanne自稱是「女漢子」，由拍拖至今絕不黐身，就算老公不在身邊亦不會突擊對方行蹤，她信心爆棚謂：「我唔怕，百分之百信任，對自己好有信心，對佢都有信任，因為我覺得感情堅固先會結婚，況且我老公都講過，佢後生時乜都玩夠，所以佢依家唔玩㗎啦。」

東網網站 : https://on.cc/東網Facebook專頁 : https://www.facebook.com/onccnews/