東方日報C1：傅嘉莉擺脫花瓶孭女一　戴祖儀演上癮吸觀眾

傅嘉莉與戴祖儀兩位無綫小花在熱播劇《刑偵12》各有發揮，傅嘉莉自奪得「女配角」獎後如虎添翼，在視帝林保怡「加持」下愈演愈出色，對於孭飛「女一」，坦言機會來到必好好把握。至於戴祖儀則愈演愈享受，拍出戲癮。

入行21年的傅嘉莉（Kelly）在《萬千星輝頒獎典禮2024》憑劇集《反黑英雄》勇奪「最佳女配角」，經過多年努力，終成功由模特兒轉型演員，之前她在《香港人在北京》飾演男仔頭角色，還原電影《食神》中的「火雞姐」獲激讚，成功搣甩「花瓶」形象；之後在《法證先鋒6》一場車上自責喊戲以多層次演繹，被讚達視后級水準。今次她在《刑偵12》飾演心理學家，面對有人格解離的張振朗及飾演其不同人格的吳業坤與黎澤恩，拍攝時不斷重複演出，可謂挑戰甚大！

黎耀祥投下演戲種子

Kelly日前接受本報專訪，直言能跟回巢拍劇的林保怡合作有如中大獎，獲益良多：「保怡演出嘅時候係唔睇對白，亦唔想對手跟足劇本，想大家喺好鬆嘅情況下演出。我鍾意咁㗎！當然冇佢做得咁鬆。保怡亦令我諗起同黎耀祥拍《財神駕到》，黎耀祥演戲好似唔係演緊戲咁，埋下種子喺我心裏面，希望向佢哋呢個方向發展，演技上唔好有咁多痕迹。」

劇中她與張振朗的親熱戲拍攝順利，但與吳業坤的咀戲則要由「姐姐」主導，她笑說：「佢對親密戲冇乜經驗，只係試過蜻蜓點水，今次第一次拍Kiss戲，佢仲話我係佢嘅『第一次』，我就話『Come On唔好怕醜，姐姐帶住你』，哈哈！」

當選「最佳女配角」後，問Kelly是否已準備好孭飛做女主角，她說：「唔係獎項令我有信心，係因為搵到演戲嘅方向，令我更有把握，當然睇番發覺仲有好多不足嘅地方。」她坦言現時市道麻麻，有劇拍已經不容易，就算是客串也會珍惜，更覺得主角來得不易，而心理壓力令身體有很大負擔，但機會來到一定會好好把握，期待之後在《玫瑰戰爭》的表現。

恨演人格解離角色

至於入行7年的戴祖儀在劇中亦令人眼前一亮，她直言拍劇拍上癮！向來予人開心、樂觀、搞笑感覺的她，在《刑偵12》的Hater角色憂鬱兼憤世嫉俗，她說：「角色完全同我相反，揣摩嗰陣好有挑戰性、好過癮，感恩遇到呢啲角色，好想畀大家見到原來戴祖儀係識演戲，可以挑戰唔同角色。」

劇集出街後，觀眾對她另眼相看，除多謝伯樂總監製鍾澍佳給予意見外，她指每一次與林保怡傾偈也有得着：「我記性好好，記得佢講嘅說話，佢分享好多鍾意嘅演出同音樂，仲話做演員一定要睇多啲戲，睇人哋點做戲、鏡頭係點、細節係點。」她希望挑戰劇中的人格解離角色：「同一套劇飾演唔同人，睇見林保怡一個人入面有9個人格，有好多細節位，而又分得出係邊個，好想未來有機會挑戰！」

除了拍劇，她亦有唱歌及拍綜藝，但現時特別享受做演員：「以前唔明前輩話投入一個角色、諗點發揮係好好玩、好有挑戰性，會上癮，依家終於明白呢個感覺。」她又指一直有創作寫歌，不會放棄歌手身份，會繼續推出新歌。

更多新聞，請瀏覽東方日報網頁：

https://orientaldaily.on.cc

東網網站 : https://on.cc/東網Facebook專頁 : https://www.facebook.com/onccnews/