娛圈單打︱撇甩醜男戀俊男　又被鬧臭好綠茶

憑GL韓劇《善意的競爭》上位嘅Girl's Day成員惠利，去年捲入前男友百賞影帝柳俊烈，同埋女神韓韶禧之間嘅「愛情三角錯」，最終柳俊烈速撇韓韶禧，「換乘戀愛」無疾而終，惠利更因為貌似受盡委屈，贏盡同情。

好啦，如今事過境遷，韓媒就爆出惠利有新戀情。佢被指跟舞蹈員蔡宇台（WOOTAE）熱戀，二人結緣於去年上映嘅電影《Victory》，因為拍戲而日久生情，關係已維持一年。惠利公司話藝人私生活無法確認，似乎即係默認。終於唔使再同「醜帥」舊愛綑綁，新歡靚仔有型，外界都好戥惠利高興。

之不過咪住先，如果熱戀一年屬實，咁舊年韓韶禧同柳俊烈撻着，關惠利乜事先？嗱，韓媒就理出時間線，指韓韶禧一直強調，柳俊烈同惠利分手後先至同自己開始，絕非「換乘戀愛」，但當時惠利以一句「真有趣」回應，令外界覺得韓韶禧係第三者。如今被踢爆跟新歡拍拖已經一年，即係早就同柳俊烈冇晒關係，韓韶禧都算冤枉咯。

喂，咁做都好「綠茶」啫！唔止韓韶禧粉絲意難平，即使係《善意的競爭》嘅粉絲，一樣好不滿惠利。皆因佢喺劇中跟女主角鄭受彬組成CP，深受「GL控」喜愛。惠利儼然韓版鄺玲玲，不時孖住鄭受彬「撒糖」搵銀，迷到粉絲不要不要的。家陣忽然爆出新戀情，仲要唔係「女女戀」，粉絲難以接受，狂轟被騙！

哈，有冇咁嚴重呀？韓韶禧都未出聲，幾時到腦殘粉出聲吖。講真，後生細女拍拖好正常，唔通吽臭咩。之但係，惠利上位全靠《善》劇，同粉絲交代一聲都好應該。

東網網站 : https://on.cc/東網Facebook專頁 : https://www.facebook.com/onccnews/