VIVA邀女團前輩合作　重現As One經典舞步

女團VIVA成軍1年，為了紀念這個特別時刻，除了推出新歌《不夠浪漫的我們》外，更策劃了一個「女團聯乘企劃」，而這個企劃更重要的是想跟歌迷說：「女團唔容易做，但團魂永在！」

《不》歌是VIVA首次挑戰抒情風格，歌詞講述成員間嘅感情及羈絆。為了呼應歌曲主題，4女決定邀請幾位曾經是女團成員的前輩合作，除了cover對方的代表作，更會請嘉賓cover VIVA新歌，實行來個「女團大交流」。VIVA表示：「香港女團真係唔易做，好多都未必可以行到最後，但女團嘅精神同回憶係永遠，同埋希望可以透過今次企劃，延續呢份女團情誼。」

今次企劃頭炮請來As One成員陳葦璇（Kira），一齊跳唱As One的經典作《Candy Ball》的killing part，影片上架未夠24小時已經過萬like，網民紛紛表示「回憶即刻返晒嚟」。而VIVA今次跟Kira合作，除了重現當年As One嘅經典舞步，更有深情訪問，Kira大爆當年與成員到韓國訓練的趣事﹕「我哋嘅宿舍有兩張好大嘅床，諗住兩個兩個咁瞓，但Chloe好得意㗎，佢唔可以同人有身體接觸咁瞓覺，結果佢自己走咗去瞓梳化！」講到當年於韓國宣傳的日子，她更感觸到眼濕濕﹕「我哋每個人都有個美少女手環，上台前會聚埋一齊打氣⋯⋯ 依家講起都起雞皮⋯⋯ 好開心⋯⋯永遠都會記得嗰個moment⋯⋯」

Kira坦言有欣賞過VIVA多次現場演出，搞到VIVA勁驚喜。Kira還感性地說：「女團一定要支持，如果冇呢段memory，可能你成段娛樂圈旅程就係自己一個係咁出歌、做嘢。有一班人真摯咁陪你做呢件事，十年後就算唔同團都會記得。」Macy立即認同：「真㗎，做團之後先感受到做團嘅好。」其他成員都紛紛和議。

東網網站 : https://on.cc/東網Facebook專頁 : https://www.facebook.com/onccnews/