RubberBand巡唱再度啟航 　海報暗藏玄機

樂隊RubberBand相隔兩年後，4子再次整裝出發舉行世界巡唱《A Night In》，將橫跨英國、北美及台灣，與世界各地的樂迷再次見面。成員 笑指上次巡演之旅至今仍然歷歷在目：「當時全球疫情啱啱退卻，我哋第一次離開香港去巡演，帶住既興奮又緊張嘅心情，就好似父母輩當年回鄉探親，帶住一袋二袋手信嘅心情，去歐洲、美洲見唔同地方嘅朋友。」又異口同聲指巡演一直是樂隊的夢想，希望將音樂帶到更遠的地方，接觸更多不同文化背景的樂迷。

這次巡演對RubberBand而言，不單是音樂旅程，同時承載着與樂迷久別重逢的深層意義，希望跟散居世界各地的樂迷近距離聯繫：「我哋知道有唔少支持我哋嘅朋友，已經移居海外、落地生根。平日未必有機會返香港見我哋一面，而巡演就係一個好好嘅機會，可以行近一步，親口同佢哋Say Hello，講句『保重』，問一句『大家別來無恙嗎？』」

RubberBand早前已率先公布首站會從英國出發：「兩年前，英國係第一個見證我哋巡演嘅地方，今次返去，感覺特別有意義。希望到時大家可以齊齊整整、開開心心咁一齊唱歌。」主音6號更苦笑指巡演有不少挑戰，包括氣候變化與文化差異：「上次最大教訓就係我喺荷蘭病咗，所以今次會準備多啲衫，以免着涼影響演出。」

對於巡演會否設香港站，RubberBand 留有伏筆：「大家睇海報估到嘅城市，其實都只係上半部。我哋仲有好多地方想去。至於會唔會喺香港開Show？呢件事意義重大，如果做到，做得成，相信要好多方面配合，讓我哋用正念去期待佢發生啦！」RubberBand有機會在港開騷，相信成員泥鯭的太太黃心穎一定開心到跳起。

東網網站 : https://on.cc/東網Facebook專頁 : https://www.facebook.com/onccnews/