容祖兒晒肩露腰艷光四射 謝霆鋒Chok爆搶Fo
陳奕迅、謝霆鋒、容祖兒、張敬軒、軟硬天師及MIRROR 12子齊集亞博演出連鎖餐廳50周年音樂會，全場逾萬座位爆滿，楊受成專程捧場。
音樂會由着白背心及孭住結他的謝霆鋒打頭陣，Chok爆彈唱《不是定理》 及《潛龍勿用》，唱經典歌《玉蝴蝶》前，霆鋒向觀眾問好：「大家好 ，我都係第1次嚟呢個場， 好開心 ，多謝你哋 ，餐廳今年50周年，但我都未夠50歲。」最後就獻唱廣告主題曲《青空》。
容祖兒穿上白色Tube Top性感露腰裝再加紅披肩現身，跳唱《我所知的兩三事》後就話：「我shake到頭暈，霆鋒應該冇乜講嘢，咁等我講，我覺得今晚好有魔力，因為召集咗班好耐冇見嘅歌手一齊上台。」期間祖兒向觀眾送飛吻，還獻唱新歌《但你要甜》，還有配合夏日的歌曲《全身暑假》。緊接穿上着白色閃片西裝的張敬軒登場，和祖兒合唱廣告歌《Make a Beat》，軒仔抱抱祖兒後，就拖住她落台，獨留在舞台的軒仔唱《羅賓》前就問觀眾：「都坐咗咁耐，不如起身跳吓舞？」再到唱Mix版《酷愛》前，軒仔又要求觀眾：「唔好坐低住」，如置身Disco的霓紅燈效下，全場high爆，不過到獻唱《賽勒斯的愛》又變回演唱會效果模式。軒仔感性謂：「好耐冇見，大家好嗎，好掛住大家，好開心喺台上唱歌，以我嘅年紀嚟講，最開心係讀中學嘅年代，有我嘅初戀，同好緊張讀書時候，我喺1999年畢業，難忘同中學同學喺學校附近嘅餐廳食嘢，之後分道揚鑣，仲有拍拖時候，希望可以唱完以下呢首歌。」送上《櫻花樹下》紀念在餐廳拍拖時間同這段感情，軒仔將舞台交給全黑打扮的姜濤，自發生「墮海意外」後再踏香港舞台的他，狀態不錯的他唱完《蒙着嘴說愛你》後，心情更見大好，他說：「Hello，我係姜濤，我同我嘅團隊MIRROR 都經歷咗好多嘢，前排自己都經歷咗好多嘢啦，學咗好多嘢，我相信自己會愈嚟愈好，我一定會，（全場拍掌），開始明白唔係有咗先去做，而係做咗先會有，（全場又尖叫），ok，哈哈，因為前排發生咗啲事，我知道點解我首歌有呢個字在內，哈哈，送畀大家《濤》。」竟然公然自抽「墮海事件」。
姜濤單飛表演完畢，就偕MIRROR 11子跳唱三首團歌，成全晚最高潮位，其中早前接受手術的Anson Lo首度踏上舞台，動作揮灑自如，回復水準。Jer表示難忘拍廣告時跟粉絲及觀眾在街頭busking ，Ian最難忘餐廳的甜品，Anson Kong(江𤒹生AK) 透露難忘小時候曾參加餐廳舉辦的青少年足球訓練計劃。
組合軟硬天師的葛民輝和林海峰戴住頭盔出場，大唱80年代歌曲，唱到代表作《廣播道FANS殺人事件》時，當年尚未出道的MIRROR，是晚被加插入歌詞中：「鏡仔 ，鏡粉，我哋支持你」，向MIRROR 致敬完後，軟硬再孖壓軸登場的陳奕迅（Eason）合唱《夕陽無限好》的二次創作版廣告歌，而Eason獨唱《打得火熱》時，有氣球從天而降。自言「冇乜聲」的他繼續發揮「吹神」本色：「我有嘢講，你哋唔使坐低住，餐廳今年50周年，細我1年，由2005年開始合作，我唱咗30周年嘅主題曲。早一排 ……，唔講啦，你哋自己feel ，活在當下，（現場有粉絲大叫l love you）l love you too，唔開心同有小小障礙嘅朋友，希望呢首歌《每一個明天》畀到正能量你哋。其實呢個Rundown係佢哋（大會揀），通常係唱《歲月如歌》係嘅國語版，因為好耐冇喺香港唱歌，所以佢哋想用我口送廣東版畀大家。」音樂會臨近尾聲時，MIRROR 12子再出場，Eason變身「第13子」跳唱餐廳廣告歌，隊長Lokman還和Eason共舞，之後Eason主動逐一和12子擊掌及抱抱，兩代人氣王打成一片，軒仔及軟硬現身影大合照，但未見祖兒及霆鋒上台。
東網網站 : https://on.cc/東網Facebook專頁 : https://www.facebook.com/onccnews/