陳康堤首次拍MV感焦慮 感激團隊支持 成就首個作品

陳奕迅和徐濠縈的女兒陳康堤CONSTANCE，簽約香港華納唱片，成為今年重點新人，陳康堤出道首支單曲《doll》，由她與知名年輕音樂人Ernest Choi聯手創作，描繪出從有毒、操控性的關係中掙脫的歷程。

新歌MV今晚9點上架，對於初次MV拍攝，陳康堤表示當日踏入人生第一個MV拍攝現場，覺得極度緊張，但又興奮期待，場景佈置令她驚嘆不已，親身經歷MV拍攝整個過程，讓她感到眼界大開！

陳康堤說：「雖然拍攝節奏好快，又有好多鏡頭要拍，但我好享受過程，愈拍愈精神，同埋感覺到同製作團隊大家愈拍愈熟，都幫到我能夠好快融入角色。其中要重複拍攝一 啲動作幅度比較大嘅長鏡頭，需要高度專注同精力，我覺得好有挑戰性呀！」

康堤續說：「好感激可以同咁優秀嘅團隊，製作我嘅第一個MV，佢哋喺成個過程中，畀咗好多支持同鼓勵我，如果無佢哋我真係唔知應該點做，有咁多好朋友參與呢個MV，對我嚟講意義重大！」

康堤表示起初知道要拍MV，感到好擔心又好大壓力，她說：「到臨拍前幾日，我直情感覺到自己愈來愈焦慮，擔心自己可唔可以表現得好、會唔會令大家失望。睇完MV後，我意識到自己仲有好多進步空間。不過我都有同自己，講呢個只係我嘅第一個MV，相信未來仲會有更多機會畀我去成長和嘗試。」

（即時娛樂）