姜濤親述墮海前想睇夕陽　盧覓雪直指「智商有問題」

MIRROR成員姜濤前日（6月24日）意外墮海獲救，昨晚出發往巴黎前在機場見傳媒，親自為事件解畫。他強調墮海純屬一場意外，透露當日在海旁跑步時覺得天氣很好，「想坐喺海邊睇吓個夕陽」、「做咗個唔好嘅示範，跨咗欄杆出面」，他憶述在起身時突然感到暈眩，導致失足墮海。今早（6月26日）盧覓雪在商台節目《在晴朗的一天出發》談及姜濤墮海一事，直指姜濤「智商應該有啲問題」。

盧覓雪在商台節目《在晴朗的一天出發》提到姜濤墮海一事：「姜濤話自己飲咗酒食咗藥，跨欄坐壆係為咗睇夕陽，點知起身頭暈跣腳跌咗落海喎！強調自己情緒冇問題，噢！如果係咁話，智商應該有啲問題。家陣成7點先日落，4點咁早去，曬到暈都應該未睇到㗎喎。」此番言論引來不少「姜糖」和聽眾不滿，有人指堅尼地城日落是4時多開始，亦有人留言「咁攻擊人比網絡上戰士更可怕」、「作為一個前輩唔係叫你體諒，只希望不再落井下石」……另外有粉絲呼籲向通訊事務管理局集體投訴。

去年5月，盧覓雪亦曾在《晴朗》中直指MIRROR成員盧瀚霆（Anson Lo）化濃妝。當時主持阮子健說起日本新宿有很多牛郎店：「啲牛郎個頭Gel起晒，又金又紫，個妝又化到好濃呀……」盧覓雪問：「濃過Anson Lo？」KY即時窒一窒再回答：「即係……濃過好多人啦。」即時在網上引起熱議。Anson Lo在同日連出多個限時動態，不斷提到化妝品和分享自己的化妝袋，疑似反擊盧覓雪的言論。