曾傲棐港鐵站內獻Sing 為DSE考生打氣 黃凱逸自爆「鐵路迷」

港鐵藝術舞台一直為繁忙的香港人舒緩壓力，DSE放榜在即，特意舉行快閃活動，邀請歌手曾傲棐和黃凱逸Zelos演出，為DSE考生打打氣！曾傲棐Arvin平時坐港鐵出入，只可以「收收埋埋」哼歌，今次可以在站內表演感到難得：「今次揀咗啲活力、R&B嘅歌，感覺就好似幫『香港』配樂，因為站內充滿人生百態，想為大家添加啲音樂，咩都想唱比大家聽！」

提到呢次活動為DSE考生打氣，Arvin「Tag」歌呼籲考生不要回望過去：「我哋學識啲教訓就記低佢，下次唔好再犯，不過人係要向前望，每一日都會變得更加好，即使有啲嘢我地唔可以控制，但每一次經歷，都會令人成長，希望大家好似歌詞咁，即使被潑冷水都要捱落去、飲咗佢就得！」

Zelos就自爆是「鐵路迷」，早前MV走訪各大港鐵車站打卡：「今次喺港鐵嘅舞台演出非常之期待，冇諗過因為宣傳新歌《心的車站》，去勻所有港鐵站，吸引大會注意，會帶到我嚟呢個舞台。呢個藝術舞台大家來去匆匆，希望我嘅歌聲可以吸引佢哋放慢腳步聽我唱歌，剛剛出咗新唱片《ZILLOW TALK》，可以慢慢揀歌。」

作為鐵路迷，Zelos賣口乖大讚：「我都算係鐵路迷，以前細個都成日搭港鐵，覺得好方便同埋好乾淨！我本身係有少少強逼症，好鍾意準時出門，港鐵係永遠唔會遲到嘅！今次要同DSE考生打氣，我都明白對考生嚟講係大事，叫佢哋唔好緊張，即係等於叫佢初戀唔使大投入咁解！不過睇番轉頭，DSE係人生一小步，前面充滿無限可能，例如我入咗行做創作歌手咁，努力做好就夠，其他嘢都係順其自然！」

（即時娛樂）