Ian為花姐「我最喜愛言論」解畫　自認想攞人氣獎：唔容易㗎！

MIRROR 成員Ian（陳卓賢）和日本藝術家上野陽介出席apm活動，現場數百Hellosss （Ian粉絲暱稱）到場支持偶像。Ian落台跟藝術品影相時全場尖叫不停，大叫「卓賢」，嘈到拆天。Ian表示自己都有收藏藝術品，亦愛行展覽，但欣賞多過買，所以收藏品數量不多，亦不會在意藝術品可有升值潛力，因志不在炒賣。

問到經理人花姐出席講座時，曾豪言謂不想MIRROR成員再攞「我最喜愛的乜乜」獎項，覺得代表沒實力，只靠投票一事，他表示：「我唔知喎，冇留意喎，根據佢之前同我哋開會，我估佢可能意思係除咗希望大家受歡迎之餘，要增進自己能力同實力，我諗佢意思唔係個獎代表冇實力，我哋好好彩啦，受大家嘅喜愛同歡迎。（咁你想唔想攞呢個獎？）都想呀。（最想攞類似『我最喜愛的創作人』？）我已經覺得自己好幸福架啦，唔容易架，我知今日活動，有啲Fans係排咗幾日隊，會心痛佢哋，但又珍惜佢哋為咗想見我或者維繫關係而付出好多。」

問他鍾意做偶像還是實力派歌手？他覺得作為藝人需要各方面配合，不會自稱實力派，但又不覺得偶像派是貶意詞，再說：「我啲Fans嘅小朋友都當我係偶像，覺得偶像就係做好榜樣，帶正面訊息畀大家，而唔係分靚仔就係偶像，我都成日提醒自己好多人望住。」再問可擔心花姐的言論影響跟頒發獎項的電台關係？他則說沒多想，亦沒看過有花姐言論，所以難作定論，亦難估電台的態度，笑言：「我都未有呢個資格去評論。」

何時輪到他舉行《Hi MIRO！見面祭2025》？他表示只知今年內舉行，但未清楚日子，目前要先注重澳門的兩場巡唱，至於有傳第二回見面祭出現「大細超」情況，Anson Lo粉絲每場獲420個名額，但同場的Jeremy粉絲只有80個名額，可擔心其粉絲會遇同樣情況？Ian就話分門票非他控制或可給予意見：「我個人最着重大家見到我或我見到大家就開心，啲飛我就唔係太清楚。（心痛啲粉絲唔夠飛？）我會盡量爭取機會見到佢哋啦。（同公司反映分飛問題？）我會了解吓喺邊個場地做先，依家我連時間、地點、同邊個隊員一齊做都未知，等我知道多啲詳情後，可能大家有機會開會時會講吓，我想見大家多啲，希望日後多啲出席Event嘅機會啦。」

他又透露11月就是MIRROR成軍7周年，兼且其所屬的「禿鷹小組」將開始在港拍攝團綜節目，他謂：「拍幾多集唔知，但拍日子唔少，希望拍多啲好睇嘅內容畀大家。（依家好熱喎？）Ok㗎，我本人唔怕熱，少出汗，聽聞都多戶外嘅。（怕唔怕粉絲跟住影響拍攝？）冇話驚，但拍攝時想進度快少少，因為係成個節目組嘅事。」

問到姜濤墮海後可有問候？他說有傳簡單訊息，相信他未必想收到太多問候，現時各有各忙，大家應留空間予姜濤更好，加上事件已過去，知他平安便可。至於Anson Lo之前接受手術，他說有問候對方，大家身體健康最緊要。

東網網站 : https://on.cc/東網Facebook專頁 : https://www.facebook.com/onccnews/