樓市專家｜湯文亮：最壞的時間已經過去 「我賣嘢就唔係睇淡嗰市」

樓市紅人、紀惠集團行政總裁湯文亮上周接受港台財經節目訪問回應坊間多個疑問，包括賣自住樓、頻頻出貨等等，更謂今次是最後一次接受的公開訪問，說是「有一批後生出來，唔好阻住人哋。」。

劈頭被問為何不斷出貨，湯文亮回應：「我賣嘢因為要調整借貸比率，唔係畀銀行call loan，要合格！物業的確價跌咗，因為疫情令好多商舖死守，出現一個沉沒成本。」他解釋：「呢個舖做生意本應每月賺20萬元，疫情每月倒輸20萬元，輸得幾年累計輸1,000萬元。疫情過去，唔係無錢賺，但唔係咁多，唔係20萬元，可能10萬8萬，計落條數，都唔知幾時冚得晒沉沒成本。」他指：「政府中小企貸款害人，唔係救你，咁你都要還錢，唔係唔使還。本應都要執笠，你就同佢打支強心針，頂到疫情過後都無力。」

湯文亮說：「最壞的時間已經過去了，你見我賣嘢係最壞的時間過咗先賣，我哋叫有經驗，跌緊我唔會賣，啲人個心態係，跌緊，遲啲咪平啲。但啲人買咗之後，見到升喎，咁就好。」

他以他賣自住樓去做解釋：「我自己住嗰層樓，兩公婆兩個工人。我太太同我講『而家咩環境呀！不如賣咗佢』。賣咗1.38億元，我收返另一層樓返來住，都係著名屋苑，但未收到，就租住其他樓先，月租75,000元，都係90萬一年。而家賣樓套現1.38億元，用5厘租金回報率計，將近700萬元一年，用4厘計就500幾萬元。減返租樓成本，有成500萬元收入，日日去福臨門都得啦！」、「所以呢個純粹係成本的問題。」

他續稱：「我賣嗰時1.38億元，滙豐王冬勝家人買較低層就1.25億元，而我賣嗰層係頂樓。正常來講，頂樓好似特色單位係貴好多，我嗰層應該係貴佢25％，而家貴10％，即是佢買入價比我嗰賣出價平10％，理論上係平20％至25％先啱，即是佢都開始追貨。」

被沽夠未？他斬釘截鐵地回答未！「仲要沽，下半年最少都要沽返上半年咁多。就無咁辛苦啦，傾緊㗎啦，好快出現，一單一單來。開頭我自己錯誤，認為手上好多靚貨，但係靚貨賣唔郁。我有好多甲廈，買嗰時買最頂樓、高層、向海、成層㗎，哎！賣唔郁。反而嗰啲山卡拉舖位賣走，點解呢，因為平。我買返來嗰時平，抵食夾大件。來緊賣就靚啲、貴啲。我賣嘢就唔係睇淡嗰市，月有陰晴圓缺。」