楊采妮獲封「永遠玉女掌門人」　特辣辣椒醬贈郭富城

90年代女神楊采妮（Charlie）憑清純面孔一鳴驚人，堪稱90年代女神，時至今日Charlie年屆51歲已為人母，迎年鮮有現身幕前，不過次次現身均令人眼前一亮，獲封「永遠玉女掌門人」！

Charlie定居新加坡後甚少於香港露面，最近返港探親時就同相識超過30年嘅郭富城經理人小美飯聚，兩人8年冇見面，傾到餐廳打烊都傾得唔夠喉，Charlie嘅初心令小美難以忘懷。小美晒出二人今昔合照對比，見Charlie保養得宜狀態好，同幾十年前靚相近乎冇分別，網民都激讚。

小美發長文指自己識Charlie時，佢只係17歲中學生，為郭富城拍廣告及MV後，玉女之路扶搖直上：「Charlie由小妹子到玉女偶像，再成為演員、導演、再成為別人的妻子和母親」小美又指喜歡Charlie善良、對朋友好又念舊，今次仲送咗得意公仔餅畀小美，又為郭富城帶特辣辣椒醬。

小美透露食飯嗰陣發生小插曲，侍應捧住2碗湯上碟時拎唔穩，Charlie嗰碗倒瀉，差啲淥到手，Charlie第一反應不斷問侍應：「你有沒有淥親？」見Charlie一共問咗3次，小美深深覺得Charlie嘅善良從不變。另外，DJ雲妮亦晒咗一張同楊采妮頭貼頭合照，雲妮形容采妮係佢人生中嘅柔順劑，「她的溫柔總令我感到舒服自在，感恩我們三十三載的友情不變。」

東網網站 : https://on.cc/東網Facebook專頁 : https://www.facebook.com/onccnews/