林盛斌接老人院代言遇騙徒　「呢件事其實要報東張」

林盛斌（Bob）昨日（8月4日）在社交平台發長文，透露早前經理人收到自稱某老人院負責人「李先生」查詢，表示希望邀請林盛斌擔任代言人拍攝宣傳廣告。經過多次電話溝通，雙方落實合作細節，更約定上星期五（8月1日）到老人院視察環境。當林盛斌一行人抵達時，卻發現原來是詐騙。Bob直言：「真係千年道行一朝喪，出嚟撈咗20年，第一次遇上呢啲點估都估唔到嘅劇情」。

Bob在社交平台以「呢件事，其實係要報東張嘅。」為首發文：「話說早兩個禮拜之前，我經理人Kaman收到個查詢，對方李先生send咗張卡片過嚟，話係旺角一間老人院嘅負責人，對上仲有個院長，佢自己係第二把交椅，負責行政，佢話佢哋想搵我做代言人拍廣告，做吓宣傳，仲想我哋棋人做埋廣告公司去幫佢喺唔同媒體落廣告，然後Kaman同佢溝通咗好幾次，感覺都正常嘅，跟住大家傾到代言人價錢同埋詳細嘅工作內容，專登約埋個電話會議，我同對方直接溝通落實，咁Kaman仲好俾心機咁做咗一份合作建議書，分析埋俾佢知唔同媒體廣告嘅報價同效用，亦都寫到好清楚喺代言人期間我會做啲乜乜乜，最後大家決定去馬，好開心，job confirmed！」

「如果大家認識我個經理人Kaman，都知道佢係一個好上心、好有交代、好有交帶嘅人，佢為咗確保所有嘢妥善處理同埋順利執行，佢約咗客戶、我、廣告導演上星期五下晝三點開會，因為Kaman想喺拍廣告同影宣傳相之前大家見一見面，順便睇睇佢哋老人院實質環境，兼傾一傾個拍攝內容，等大家可以好好準備同規劃之後嘅工作。到咗上星期五下晝2:55，我哋去到呢間老人院門口，Kaman就打電話俾呢位李先生話俾佢知我哋到咗，然後對方話：『唔係約咗聽日咩？我啱啱出咗去，半個鐘後先返。』咁唔緊要啦，半個鐘啫，冇所謂嘅，收咗線之後，我哋就入去老人院嗰度諗住坐低等佢返嚟。好啦，高潮嚟啦……」

「入到去，我哋同接待處個職員講話我哋約咗李生開會，然後個職員就黑人問號：『李生？邊個李生？我哋呢度冇呢個人。』吓！跟住有位女仕行咗出嚟，佢叫林主任，佢同我哋講，原來過去呢段日子，呢個所謂嘅『李先生』，已經用過唔同嘅名字、身份、卡片同資料，利用佢哋老人院嘅名義去訂唔同嘅物件同貨品，甚至搵啲裝修公司話老人院要維修quote價，又試過book咗一個按摩師上到去話幫啲老人家按摩，林主任話呢張卡片嘅內容有啲係真，有啲係假，同埋其實之前佢哋已經報咗警，備咗案，喺呢個時候，Kaman不斷打電話俾呢個李先生，對方已經冇再聽電話，冇任何回覆。呢一刻，我哋幾個人，進入咗懷疑人生嘅狀態。」

「真係千年道行一朝喪，出嚟撈咗20年，第一次遇上呢啲點估都估唔到嘅劇情，喺度奉勸咁多位幕前同行，包括經理人同助手，原來呢個世界上真係會發生呢啲咁荒謬嘅事。我估一定會有人話：『下次收到卡片，都上網查吓間公司同埋電話係咪真，又或者打去人哋個總機度，check吓有冇呢個人囉！』講真，事後孔明就梗係容易啦，我都諗到啦，但係當每日都會收到唔同渠道嘅工作查詢，又真係好難個個都咁樣做，同埋如果真係打去，對方又係真嘅，又會搞到件事好怪同好尷尬。雖然我唔知道呢啲算係騙案定係惡作劇，亦都唔知道點樣可以叫大家小心避免呢啲事，總之，就係要執生啦，唉，黐鬼線！呢單嘢，真係好癲。」

另外，前樂隊MR.成員Ronny（黎澤恩）亦遇到同一騙徒。近年在TVB拍劇的Ronny不時飾演反派，他在社交平台貼出自己的4個奸角劇照，透露同樣收到老人院話事人「李生」的訊息。Ronny寫道︰「究竟我呢個深入民心嘅反派形象 點樣可以代言一個安老院？ 即係sell啲孝子孝孫『嗱我哋安老院 個代言人咁兇 應該冇人敢入嚟偷生果啦啩？』、『我哋安老院門口放呢四個人張相 驅邪驅鬼 保平安啊！』 咁呀？」。

Ronny在帖文未段搞笑寫道：「喺截稿之前 小編收到風 @bob_lamshingbun 都好似中招。呢單嘢真係……總之各位經理人、藝人小心！江湖騙子四處招搖撞騙，遲早瀨嘢呀你哋！」Bob今早留言回應：「其實有冇諗過，係暗黑宣傳？我同你都出咗依張卡片，其實某程度上，都係宣傳咗嗰間老人院」。而Ronny經理人Anna就向傳媒透露，接洽後覺得整件事有可疑，於是打去老人院，當對方聽到「李生」時，已經斬釘截鐵表示是騙案，並透露已多次報警。