許靖韻沙排賽前特訓扭傷腳趾︰諗起以前打校隊練波日子
周殷廷、張馳豪（Aska）、許靖韻（Angela）、黃明德（Dark）、顧定軒（Zeno）、VIVA成員Ada及Val C、Lolly Talk成員Elka，早前參與商台在屯門新咖啡灣沙灘排球場舉行的《沙灘排球Get Set Play》。比賽由「881隊」與「903隊」兩隊進行對決，881隊陣容包括：歌手Ada@VIVA、張馳豪、許靖韻、顧定軒、雷霆881阮子健、楊樂笙、吳詠希、熊書頤、馬騮搣、天欣、區可頣、陳朗杰及阿料；903隊陣容則包括：歌手Elka@Lolly Talk、Val C@VIVA、周殷廷、黃明德、叱咤903森美、朱薰、傑朱、Elsie、Dickson及Jeff。
曾是中學排球隊成員的許靖韻（Angela）代表881隊轉戰沙灘排球，賽前與隊友進行連串特訓。她表示︰「第一次練波嗰日，可能因為平時喺室內打開排球，而且好耐都冇打沙排，嗰晚返到屋企先發現三隻腳趾拗柴，全部瘀晒變成黑色。我自從中學之後就冇打過比賽，今次比賽令我諗起以前打校隊同大家一齊練波嘅日子，覺得好似返咗中學咁熱血。」
VIVA的Ada及ValC@去年參加《903 AllStar排球賽》，超水準球技備受網民讚賞，今次分別代表881隊及903隊參加沙排比賽。Ada在第二局為881隊開球連取6分，表現亮麗。她指：「比賽前一個半月，我哋每個禮拜就會練一至兩次波。今日連續開咗6球，冇諗過自己嘅表現都非常唔錯，所以好開心。喺正式沙排賽事，我最期待嘅就係大家好瞓身去救波，因為奮不顧身咁去救起個波嘅嗰種感覺好熱血，而且場上得兩個人嘅時候，對佢哋默契同配合嘅要求係非常之高。」
代表903隊出賽的Val C則不滿意自己的表現：「今次有專登練沙排，不過開波方面對自己有啲失望，因為都失咗好幾球。而且今次都練咗新嘅跳法去開波，覺得有少少可惜。第二局最後一分換入去嘅時候，set咗一球畀隊友Jeff打殺波，贏咗嗰吓feel到大家好齊心。正式嘅沙排賽得兩位球員，所以除咗考驗力量，其實都好考眼睛同大腦，好期待喺比賽中見到運動員大腦高速運轉，同接角球嘅精彩場面。」
同樣是中學排球隊成員的Lolly Talk成員Elka首次接觸沙排，比賽期間代表903隊負責最關鍵性的一球，可惜緊張之下發球失誤輸掉第三局。Elka指：「今次球賽最深刻嘅就係最關鍵性嘅一球由我嚟開，當場緊張感直升100分。之前冇打過沙排，一直感覺上都以為同排球係同一樣嘢，今次發現原來沙排係困難好多。第一可能係落場嘅人數少啲，第二係喺沙上面速度原來會慢好多，第三係個波嘅重量同普通排球唔一樣，所以對我嚟講都係一種挑戰。」
初次接觸沙排的周殷廷今次代表903隊出戰，雖然未能為903隊得分，但十分享受沙排比賽。他表示：「 第一次接觸沙排嘅感覺比我想像中難好多，因為從來都冇乜點玩過，所以喺協調上面係完全仲係適應嘅狀態當中。比賽最深刻嘅一幕，係我用頂頭槌嘅方式去頂番個波轉頭，然後先發覺『咦！我唔係踢緊波』，如果有下次，我一定會再參加。」
運動健將張馳豪（Aska）中學時期已接觸沙灘排球，今次與881隊友顧定軒（Zeno）及天欣默契十足，從接球、傳球到扣殺，多次為881隊取得分數。Aska指：「我好掛住排球，今次有機會同一班DJ、歌手朋友們一齊打沙排係好開心。平時有做開運動，中學時代亦有打過沙排，所以都發揮得唔錯。今次最深刻係睇到4位運動員嘅表演賽，強者對強者，好震撼，佢哋真係好犀利。」
黃明德（Dark）在中學時期開始打排球，今次為903隊更多次瞓身救波。他說：「沙排同室內排球最大嘅分別就係個地下，同埋沙排呢項賽事好受天氣因素以及其他外在條件影響。今次沙排最大嘅收穫就係識咗一班朋友，因為小弟喺呢一行冇乜朋友，個人比較『摺』，亦都唔係好識同人相處，之前約出嚟練波，又會一齊食飯傾偈，所以好開心，因為打沙排識到一班朋友。」
熱愛排球的顧定軒（Zeno）同樣表現出色，為881隊多次成功救球。Zeno以一個字形容今次沙排比賽：「一個字『熱』！不過打沙排都幾爽，因為跌落地唔痛，所以每球都可以瞓身咁去救波，同時都獲得咗一身古銅色嘅肌膚。我十分期待可以現場欣賞正式沙排比賽，見到一班又瘋狂又熱情嘅觀眾，因為如果大家都好投入，成個比賽就唔淨係運動員，而係每一個人都有份，咁個氣氛就好好喇！」
（即時娛樂）