方力申親解「唔鍾意生女」真相：差啲令到我家變

藝人方力申（小方）今日（3日）出席活動，近日他在音樂會上宣布胎兒性別，並笑言「接受唔到生女」，他指因為這句說話而被罵多日：「我教游水嗰度好多阿姐藐我，問我點解會咁講，點解接受唔到生女，生女幾好，就連我外父都問我太太咩事。」他強調自己很想生女，但揭盅當日以為是仔，擔心太太以為他會不開心：「所以我就同太太講，你唔使擔心我，我好鍾意仔㗎，我全日都Tune咗自己係生仔，所以先話接受唔到，報紙嘅標題全部都係咁寫，差啲令到我家變。」

他坦言已開始感到做父親的壓力，指手機上不時見到有如何當個好爸爸的視頻：「見到有人話你係你個女第一個愛上嘅男人，覺得好感動。（咁接唔接受到佢將來拍拖？）我見荷里活有個明星話，16歲嘅女帶個男友返屋企，個星同個男仔講，你同我個女出街，喺出面做過乜，返嚟同我做一次。（接受到囡囡16歲拍拖？）16歲已經好好，冇得諗咁多。」

談到太太身體情況，他透露太太的妊娠反應比之前減少，但晚上不時要去廁所以至影響睡眠質素，坦言現時終於知道母親的偉大及辛苦。問到太太是否仍會陪他開工？他說：「係我之前有音樂會，佢會嚟睇，但太遠就唔會，佢依家懷孕個幾月，坐長途車都辛苦。（太太分娩前夕你會唔會停工陪佢？）呢個爭論咗好耐，總之地方近嘅工作都可以，要搭飛機就唔好，太太暫時計劃順產，雖然更難就到，但會協調到，我到時會入就產房。」問到可會搞Baby Shower？他稱結婚時未有大排筵席，可能趁小朋友百日宴時搞派對招呼朋友：「不過太太驚得失朋友，怕請唔晒，所以慢慢再諗。」問到可會邀請前度鄧麗欣？他笑言：「呢個咁尖銳嘅問題，今日唔係好方便答你。」

東網網站 : https://on.cc/東網Facebook專頁 : https://www.facebook.com/onccnews/