MIRROR「夜粥小組」首開騷　Lokman帶頭整喊全隊人

MIRROR小隊「夜粥小組」昨晚（28日）在亞博舉行首個小組騷《Manifest |W.T.F. Live 2025》演唱會，4子王智德（Alton）、江𤒹生 （Anson Kong）、陳瑞輝 、（Frankie）和楊樂文（Lokman）一開場Rap住跳唱，勁歌熱舞Medley，觀眾勁High差不多企足全場，唱到《放低燈牌》時，4子走落台與觀眾擊掌，到演唱會尾聲，4子合唱最後一首歌《大丈夫》後，感觸落淚齊齊變喊包，場面感人。

Lokman邊喊邊說：「排呢場騷好辛苦，好多不同心情變化，最後感到在座咁多位陪伴來到這個舞台，多謝！」AK多謝台上的Dancers和排舞師：「同埋想多謝呢幾位夥伴，開心以組合形式開騷，排騷真係好辛苦，但玩得好開心，希望呢個期間限定多啲嚟密啲手，下次玩得再開心啲，幾辛苦都唔怕。」向來寡言的Frankie就表示：「我好少講嘢，講親都係肯定，我好少講呢句：『我愛你哋！』」Alton就指一開始做騷有好多未知之素：「唔知點做、唔知做乜，開過好多次會都係冇答案，好恐怖！相信繼續行就搵到答案，直到遇到團隊，唔係搵到答案，係更多未知。點解咁辛苦呢！我哋已經做開運動，冇做運動唔知點頂？有啲嘢唔使答案，搵到力量就得。」

騷後4子受訪表示今個騷要跳好多舞，跟MIRROR的排練差不多，不算最辛苦，Alton笑指參加《全民造星》才最辛苦，今次演出只需要做好自己分內事，其他方面都有好多不同支援。提到排練期間Alton、Lokman和Frankie先後病倒，Lokman咳及感冒，被幾種病痛襲擊，Frankie就發燒，Alton指大家都帶病去排練，幸好開騷前痊愈。近3小時的演唱會，4子幾乎由頭跳到尾，AK爆排舞時間好長，每日跳足7、8小時，Alton更說：「有太陽就跳，冇太陽就唱。」又笑指排舞時間耐，泊車被抄了多張「牛肉乾」。

Lokman台上帶頭最先喊，是否最感觸？他說：「咁多粉絲支持，大家笑得咁開心，直接交流就喊囉！真係要多謝團隊的幫忙，冇佢哋支持應該仲辛苦，所以突然流下眼淚。（你整喊晒隊友？）對唔住囉！sorry，好想藉機會多謝身邊所有人。」Alton指綵排時無預大家會喊。

若開多場體力能夠應付得來，4子齊表示有足夠體力，AK表示仲很有電力，不過又冇想過要開多場：「一場或幾場都好，都會盡力去做，保持專心和享受，唔係計次數，最緊要每場騷玩得開心。」Lokman就表示：「做一場唔好處係冇得再演，花咁長時間只表演一次，但好處就係嗰場含金量就最高。」由於盧瀚霆（Anson Lo）做手術後暫時未必能跳舞，問會否影響MIRROR稍後演出？Lokman表示未清楚。至於姜濤墮海事件，4子都有傳短訊問候關心，AK認為姜濤已經解釋，希望給予空間。

東網網站 : https://on.cc/東網Facebook專頁 : https://www.facebook.com/onccnews/