《晴朗》PA蔓兒被炒後與盧覓雪飯局　林海峰：返鄉下食餐好先再算

商台節目《在晴朗的一天出發》任職PA的蔓兒，早前在網上自爆被炒而加入失業大軍，但粉絲數則飆升至1萬。另外，她澄清被炒跟盧覓雪對姜濤的評論無關，並貼出《晴朗》仝人包括盧覓雪、阮子健及節目German等飯局合照，唯獨不見林海峰（Jan）。蔓兒今天（3日）分享多張與Jan合照，表示通知對方自己已被炒，獲Jan回覆：「返鄉下食餐好先再算。」

蔓兒今日貼出多張與林海峰的合照，其中一張是她與港鐵站內Jan的廣告合照，寫道：「蔓兒而家失業，呢個人仲指住我個頭嚟笑，你話佢係咪好衰？！」

蔓兒又分享做《晴朗》與Jan過去7年相處的點滴：「仲記得七年幾前第一日返工，佢無端端問我有冇男朋友，心諗做乜，跟住佢話如果份工唔啱返就去嫁人，唔使夾硬返。心諗使唔使第一日返工就咁兇新人（仲要咁父權）。」

蔓兒憶述：「返工頭一年都係好驚，乜都唔識又做得唔好，成日俾佢話，然後自己落後花園喊。啲同事話好彩佢近年已經收咗火，可能做運動有安多芬與佢，比着係以前，我可能一早俾人炒咗。」

蔓兒表示跟Jan經已合作7年，熟習他的脾性：「熟習到有時佢話我都唔會驚、唔會理。上個禮拜仲同佢嘈交（其實係佢話我但我抵唔住頸駁嘴），兩個小學雞互片搞到張部長企喺隔籬好無奈~好彩最後冇事，因為我已經原諒咗佢。」

蔓兒又指出曾經與Jan談及搵新工的話題。「呢幾個月都有半認真半講笑咁同佢講話要搵工/轉工，佢（Jan）就話外邊環境好差好難搵工，又話平時去間Cafe 人哋都係幾十蚊粒鐘，呢度起碼穩定咪返住先。心諗我都知難搵工，但呢度無發展我冇可能一世幫佢喺度買早餐（佢就想~）」

蔓兒表示：「以前有諗最多做到佢退休就唔做，估唔到而家我退休，佢都未（有排）。再估唔到嘅係我冇得做，仲要我自己通知佢，搞到好似我炒佢咁。#大個仔啦以後早餐食自己 #我返鄉下耕田種米先啦（大紅人要排舞台劇好忙㗎！搭巴士搭地鐵見啦！）（佢無follow我IG所以可以任講佢壞話）。」