東方日報C1：黃宗澤護花有功　成功取悅蔡潔

貴為圈中筍盤的黃宗澤（Bosco），與花旦蔡潔「友達以上，戀人未滿」，除了對女方讚口不絕，更親自下廚讓對方「登堂入室」，但他仍樂於維持老Best關係。近年代言、商演做到冇停手的Bosco，生財有道，自爆鍾情「婆仔式投資」。蔡潔亦指Bosco的工作態度激勵她不少，力讚他的星途不止於此。

藝人黃宗澤與蔡潔經歷約10年的合作，終在無綫熱播中的劇集《執法者們》內「結為夫婦」，隨着劇情歷盡生關死劫，令劇迷睇得虐心。典型人馬座性格的Bosco雖然不時愛開蔡潔玩笑，但直認二人相當投緣，難怪成為緋聞男女。日前Bosco接受本報專訪時亦大讚女方：「佢雖然係文青女神，但份人唔計較、唔做作，好多嘢都唔需要人照顧。有時大家冇嘢做會約食飯，我甚至喺屋企下廚招呼過佢，真朋友嚟㗎！」

與蔡潔一直未有進一步發展，Bosco解釋：「第一眼見到佢時，覺得呢個女仔好靚，但當時已經名花有主，後來相處耐咗就成為朋友。或者咁講啦，有啲人畀你嘅感覺係做朋友好適合，拍拖就另一回事！」不過，Bosco直認蔡潔對自己影響力大：「佢帶隻貓嚟我屋企，出街啲朋友又會帶我去睇貓，耳濡目染下，年幾前我都變埋貓奴，仲要同佢養埋同一款貓添！」

談到今次與蔡潔第8度結劇緣，Bosco拍攝時充當「護花使者」，他說：「有次喺鑽油台拍外景，佢嗰段戲嘅造型只得條薄薄嘅吊帶裙，連鞋都冇，我擔心佢如果踢到生銹鐵就大件事，所以極力幫佢申請一對鞋，點知拍到佢畀林嘉華射殺嘅時候現場爆屎渠，雖然後來清潔咗，但都好令人不安，蔡潔就話好彩有我咋！」

「婆仔格」守住荷包

Bosco承認自己在單親環境長大，對戀愛未有太多憧憬：「你可以話我好現實，喺我心目中，最緊要係工作、媽咪同朋友，其他嘢順其自然，冇得強求。（依家仲係不婚主義？）暫時係。（唔鍾意小朋友？）唔係，係覺得自己性格跳跳紮，而養大一個小朋友需要好大責任，依家先嚟生嘅話，冇必要等個小朋友成長後，用佢最好嘅時光嚟照顧我呢啲老人家嘛！」談到擇偶，他爽快表示：「我會睇外表先，唔係話要好靚，最緊要合眼緣。我鍾意女仔『型』，好似日本舞者Kyoka咁，令人好想望多佢兩眼。」

現時經濟不景氣，但Bosco的作品依然「愈拍愈有」，荷包隨之腫脹。談到投資，他坦言： 「我唔鍾意有賭博成分，所以股票一定唔啱我。我會學人買磚頭、買金、買古董車同做定期囉！」說到他「婆仔格」時，他說：「我認㗎，可能因為媽咪教落啦，最緊要穩陣。你又唔好話，我買金真係賺到笑，古董車就有得玩，放番出去又唔會蝕。（呢幾年冇買樓？）寧買當頭起呀，幾年前入咗個工廈單位就暫時收咗手。」

對於Bosco的誇讚以及彼此間的珍貴友情，蔡潔受訪時亦坦言：「其實佢影響咗我好多，尤其工作方面，因為我見證過佢拍劇受傷，然後忍痛返嚟開工，仲要做到最好，真係激勵到我，要提醒自己繼續努力。（佢冇冇教你投資？佢買金好叻。）冇喎，但唔介意佢喺手指隙流啲出嚟畀我，哈哈！」她又認為Bosco的星途可以繼續「升級」：「佢嘅發展一定不止於此，我都希望自己可以好啲，等大家『頂峰相見』！」

此外，蔡潔日前孖林夏薇到馬來西亞拍攝真人騷節目《營業吧！花花》，現場主持提到她與Bosco劇中的感情戲深受觀眾喜歡時，她說：「我收到的反饋都很好，我跟他對戲時，也情不自禁欣賞他的演技。」而上月底生日的林夏薇，獲現場粉絲送蛋糕慶祝。

更多新聞，請瀏覽東方日報網頁：

https://orientaldaily.on.cc

東網網站 : https://on.cc/東網Facebook專頁 : https://www.facebook.com/onccnews/