鄧麗欣慶祝歌迷會成立18周年　宣布演唱會加場

鄧麗欣（Stephy）歌迷會「STEPHY FANTASIA」成立18周年，日前她相約260多位「肥番」（粉絲暱稱）」舉行慶祝聚會，超級寵粉的她跟歌迷玩遊戲、近距離接觸及逐一拍照留念，被「肥番」的熱情打動下，在大合照期間感動得偷偷落淚，Stephy說：「歌迷陪住我一齊成長，真係好感觸，有啲仲生埋小朋友，成件事係好得意，好似大家一齊生活咁，所以今次係特別感觸同開心嘅一次。今年應該係最多人嘅一年，喺大合照時嗰一刻突然好感觸。好多人話我寵粉，其實我都唔係為咗寵幸佢哋而做啲乜嘢，大家咁支持我，我會有動力做得更好，見到佢哋開心我就會好開心。」

歌迷不時大呼期待Stephy 9月20日於澳門舉行演唱會，聚會當日，歌迷會更特意設計了扭蛋遊戲為演唱會應援籌款，Stephy幸運抽中大獎，將行李帶獎品掛上身，扮選美冠軍繞場一周。她的個唱前天優先訂票火速秒殺，在門票未公開發售前，她驚喜宣布加開9月21日一場，優先購票將於本月16號。Stephy說：「今年3月香港演唱會得到歌迷嘅喜愛並且能夠移師到澳門演出，真係好開心同感恩。上次做足200分，今次我要做到300分！上次無敵風火輪打咗2個圈，今次會唔會挑戰3個呢？哈哈……大家拭目以待！目前要為澳門演唱會同拉闊騷做好準備，身體健康係最緊要，依家開始要保養吓身體，要注重飲食、休息同運動，保持自己體態。」

首次到澳門開騷，Stephy透露將會有驚喜彩蛋，她說：「澳門睇騷就睇得多，今次去搞演唱會，係有少少不知所措，因為對個場地有啲陌生，好彩就係喺香港run咗一次，所以冇咁緊張，但就未想像到會係點，不過咁樣係幾好玩嘅！盡可能都會送驚喜畀大家，都會考慮加入上次冇唱嘅歌曲，希望帶畀大家新鮮感。仲有冇新嘅元素？大家入場就會知道。」

提到對澳門最難忘的經歷？Stephy想了想說：「最難忘係我人生第一次跳Bungee jump，當時係全世界最高嘅，跳落去嗰一下未知，但到依家仲歷歷在目，未跳過嘅人真係唔知咩叫腳軟架！哈哈……同埋葡撻、椰汁雞麵、海鮮……開騷前就唔食得，開騷後會食返夠本！」

東網網站 : https://on.cc/東網Facebook專頁 : https://www.facebook.com/onccnews/