曾樂彤拍拖都要Me Time　揚言：單身不會死

獨立歌手曾樂彤今年繼《白月光》、《蚊子血》後，第三首派台作品《單身不會死》正式出爐，唱出單身無關輸贏，不論你處於任何哪種感情狀態，大家都應擁抱「單身不會死」的精神。

曾樂彤直言就算拍拖都需要Me Time：「就算我拍緊拖，我都好需要獨處，或者同朋友去玩，這些是我必須的精神空間」，她補充跟朋友及伴侶相處其實是時間分配問題，平衡兩者最重要，並分享其「扮黐住」理論：「一聽到有人問我，如果沒了Me Time，我就已經皺眉大喊唔得，我唔係朝見口晚見面嗰種人，扮黐住就得，例如工作時send message話掛住，知道大家心有對方都夠晒。」延續一貫充滿女性視覺嘅作品主題，曾樂彤今次填詞呼籲女仔要識揀，放下無謂的情感包袱、社會標籤：「要知道咩先係對自己最好，唔使為咗唔值得嘅人用盡心機。」

至於MV更專程找來女性班底領軍，十分「抌本」安排了排舞師Christy編舞，對曾樂彤而言又係一個新挑戰，「通常我創作嘅時候，會同步構思埋MV畫面，我將今次嘅挑戰擺咗喺舞蹈上，而Christy將我腦入面嘅畫面呈現出嚟，能夠用舞蹈表現出力量同自信，真係超開心。」曾樂彤最後搞笑呼籲：「與其再問人哋點解單身，反而應該問點解會選擇結婚？當網絡上好多人都會惡搞結婚後嘅生活，或者社會對於婚姻，根本未有一個通俗意義上嘅好處。不過無論單身定結婚，都係自己嘅選擇，無需要畀人干預。」

東網網站 : https://on.cc/東網Facebook專頁 : https://www.facebook.com/onccnews/