麻雀樂團｜郭柏妍為角色剪走20年長髮 日夜練習大提琴

譚俊彥、李佳芯、郭柏妍等主演的TVB劇集《麻雀樂團》下周一（28日）首播，劇情講述大龍鳳麻雀館第二代老闆司徒久（譚俊彥飾）與親生女兒沈家明（郭柏妍飾）的相認故事。郭柏妍飾演熱愛大提琴的純真少女沈家明，為配合角色剪了一頭清爽短髮，令外表比27歲的真實年齡還年輕。

她受訪時表示今次剪短髮是逾20年來的第一次，因此曾十分不捨得。「我由細到大都好少剪短頭髮，唯一一次係我婆婆叫我剪，剪完之後發現其實唔係好啱自己，之後嗰20年都冇試過短頭髮，所以呢次對於我嚟講係一個幾大膽嘅嘗試同挑戰。其實我都好唔捨得，監製叫我剪時我都覺得『真係剪？』，但後來我覺得作為演員，呢個都係幾大嘅突破，同埋頭髮剪短咗可以留長番嘛。呢個短頭髮，事前試咗好多次唔同造型，好多謝工作人員同監製咁用心幫我做一個適合我嘅短髮，希望大家都會鍾意我呢個新形象啦﹗」郭柏妍為紀念20多年來首次剪短頭髮，特意拍攝並上載剪髮過程影片。片中可見她神情緊張，不捨之情溢於言表，甚至一度眼泛淚光。

除了剪髮，郭柏妍還為新劇角色學拉大提琴，並於開拍前日夜練習，主動拍片傳予劇組改善表現。她更幽默地為家居練習照加上「特別馬賽克」，認真之餘不失趣味。郭柏妍透露，雖曾學習單簧管，但與拉大提琴完全不同，必需從頭學起。她感謝監製與公司安排專業老師手把手教導，亦自律每日練習，即使早前於台灣滑板時手部受傷，康復後仍即時復課。她坦言離專業水平仍有距離，但盼以最大努力呈現逼真演奏感，讓觀眾感受到她的努力。提到大提琴體積龐大，出入時易撞到人，她更對學習大型樂器的愛好者表示敬佩，認為唯有熱愛與恒心才能堅持。

（即時娛樂）