姜濤唱「Ocean歌」自抽　Eason霆鋒世紀合照

MIRROR人氣王姜濤上月發生「墮海意外」後被網民瘋狂抽水，前晚他再踏舞台，情深剖白表示「經一事長一智」，又以代表作《濤》公然自抽，當中一句「I'm in the ocean」夠晒應景。至於陳奕迅在後台被「鏡仔」瘋狂集郵，十足見面會，又與老友謝霆鋒世紀合照！

被譽為「最強卡士」的音樂會前晚在亞博舉行，曾先後擔任連鎖快餐店代言人的謝霆鋒、容祖兒、張敬軒、陳奕迅（Eason）、軟硬天師及男團MIRROR為品牌慶祝50周年，當中姜濤自發生「墮海意外」後首踏舞台，更是隊中唯一有機會單飛獻唱的歌手，他感性說：「Hello，我係姜濤，我同我嘅團隊MIRROR都經歷咗好多嘢，前排自己都經歷咗好多嘢啦！學咗好多嘢，我相信自己會愈嚟愈好，我一定會。」又表示開始明白一個道理：「唔係有咗先去做，而係做咗先會有，所以大家加油，唔好放棄。」贏得全場掌聲。

Anson Lo康復跳唱

姜濤出事後引發飲食平台及大批網民瘋狂抽水，更有人以其「潛水」個唱海報揶揄他「神預言」，事隔11日，他大方「自抽」說：「嚟緊呢首歌，我諗咗好耐……呢首歌好有意義，因為前排發生咗件事，我知道點解首歌入面出現呢一個字，哈哈！OK，送畀大家《濤》！」歌詞中一句「I'm in the ocean」正好呼應其「墮海」，連台下觀眾亦忍俊不禁。姜濤又偕MIRROR隊友跳唱團歌，當中接受完手術的Anson Lo上周在公開活動上舉步維艱，但前晚已生龍活虎地跳唱，令粉絲安樂晒。

其後，戴住頭盔的軟硬天師獻唱《廣播道FANS殺人事件》，並改歌詞加入「鏡仔、鏡粉我哋支持你」。壓軸登場的Eason自言「冇乜聲」，仍不改「吹神」本色搞笑說：「我有嘢講，你哋唔使坐低住，早排……唔講喇！你哋自己Feel，活在當下。」音樂會尾聲，MIRROR再度出場，Eason變身「第13子」跳唱共舞，又與他們逐一擊掌，可惜打頭陣的謝霆鋒未有現身，兩大天王無緣相隔20多年世紀同台，但他們在後台把握機會合照，更齊齊扮鬼臉，勾起當年反串「男版Puffy」的回憶殺。

Eason在後台亦變身「吉祥物」，被MIRROR成員輪流集郵，被網民笑稱似足「Eason見面祭」。有份影相的Anson Kong昨日出席活動時表示，與Eason見面感覺夢幻：「第一次綵排，佢逐個同我哋握手，仲講得出所有人嘅名，真係High到飛起，我哋仲好厚顏，明知阻人都逐個成員同佢合照。」他透露早於當舞蹈員時已跟對方影過相，豈料10年後可同台演出。

張敬軒病住唱　容祖兒Shake 到暈

天后容祖兒是前晚音樂會的唯一女將，穿上Tube Top加紅色斗篷，晒纖腰又唱又跳，笑言「Shake到頭暈」，不過暈住都要講，能跟很久沒合作的歌手同台實屬難得，雖然她未有機會跟師兄謝霆鋒合唱，但在社交網分享兩人互相打氣的珍貴一刻，見她在台底拉筋時，與先上台的霆鋒擦身而過，即互相叫加油。

至於與祖兒合唱的張敬軒發動全場起身跳舞，又跟粉絲問好：「好耐冇見，大家好嗎？好掛住大家，好開心喺台上唱歌。」他自爆連鎖快餐店勾起其初戀回憶，並送上歌曲《櫻花樹下》說：「呢首歌紀念拍拖時間同這段感情。」另外，他在社交網上載哮喘噴霧照，原來是帶病上陣，他說：「唔使擔心，我冇感冒吖！我聲沙沙因為呢位老友。」

東網網站 : https://on.cc/東網Facebook專頁 : https://www.facebook.com/onccnews/