葉蒨文向曾展望派定心丸　好感度仍是最高

葉蒨文（Sophie）在無綫戀綜節目《女神配對計劃》中，跟力追她的曾展望（GM）組成「最強CP」，可惜男方太急進，正所謂物極必反嚇親女神，加上另有情敵林澤謙（Him）出現，網民為GM勝算下降而擔心又傷心，Sophie亦得知GM陷入「失戀Mode」，即在留言呵番「準男友」，似乎GM仲有機會贏得美人歸。

她在社交網上載新相，留言鼓勵GM勿灰心，表示在眾追求者中，目前對GM的好感度仍是最高，其黯然離場的失落樣，一直在她腦中揮之不去，雖然對他有少許反感，但亦感受到其真誠，所以給GM溫馨提示：「如果佢想同我再拉近距離，我希望佢Hold On，亦希望佢喺呢次食飯嘅經驗度更加了解自己。」同時她承認對另一位追求者Him有興趣，不掩飾謂：「想睇佢更入邊嗰層，期待之後嘅交流。」

Sophie接受訪問時，被問到可有跟對象私下見面，她說：「都有男嘉賓諗住約我去睇戲，又有人諗住約我一齊睇直播，但係因為個節目有唔可以私下見嘅法則，所以我哋暫時唔可以私下約會嘅，要將所有嘢留畀個節目。」她明白要遵守節目規定，但又發覺有問題出現，她謂：「我哋幾位『女神』都有同節目組反映過，因為同男嘉賓見面時間太短，仲要相隔一段時間，好似上次同今次拍攝時間相隔差唔多1個月，唔准見面又唔可以傾太多偈，其實好難搞，所以希望節目可以拍密啲，等大家啲火花唔好熄滅。 否則真係講笑咁講句：『有feel都變冇feel，相隔太耐，男嘉賓都結咗婚生咗仔啦』。」

至於跟Sophie同拍攝節目的羅毓儀，被問到跟追求者可有新進展？她則謂：「都有，因為記者會完咗之後，我哋有台前幕後成班人一齊喺公司canteen度食下午茶，我哋成班男男女女一齊有講有笑，食飯嘅時認識多咗大家。除咗同自己組嘅人之外，仲同其他組嘅人都熟落咗啲。」同時，她又大讚好姊妹Sophie，覺得她思想正向且性格開朗，跟自己的內向性格成一凹一凸的絕配，覺得在好友身上獲益良多。

東網網站 : https://on.cc/東網Facebook專頁 : https://www.facebook.com/onccnews/