釗峰淪為「渣男」　冇怪責前度公開親蜜照：有叫佢唔好再Post

組合C AllStar成員梁釗峰被分手化妝師女友Karen爆出軌後，人氣大跌成「渣男」，在未分手前他接受電台訪問，大談擇偶條件：「最重要心地善良，同埋肯講對唔住，一個肯講對唔住嘅人，係對我有好大吸引力，因為會顧及人感受。」他指Karen正是肯講對唔住的心，剛拍拖時很了解他：「大家會代入雙方思考，會考慮人哋點諗。我哋唔會隨便發脾氣，只要唔動氣，大家就無事，我哋成日傾呢啲嘢。」

他又指沒有因Karen　Po相令關係曝光而遷怒於她，亦曾和她傾過公開關係一事，只是朋友覺得照片過親密，覺得會影響外間觀感，所以曾「溫馨提示」對方：「同佢講唔好再post啦，反正大家都知道喇。」在訪問中直認是大男人，低調關係只想保護戀情：「因為我驚無能力照顧我身邊嘅人，所以我要逞強！我唔係要你乜都聽晒我講，但我驚你唔聽我講而出咗事，咁我就保護唔到你，我會仲擔心。因為佢唔係圈內人，扯咗佢入嚟，我會好難保護對方。」快「男人40」的釗峰亦因大男人主義所以未有結婚計劃：「我成日認為事業要達到一個點先會諗（結婚），因為未能夠畀到一個穩健、舒適嘅空間畀你身邊嘅人，所以就唔會諗住。」現階段，釗峰坦言只想專注勇闖其自資獨立歌手的路。

釗峰又詳述離巢主因指：「我有惰性，呢十幾年太舒適，再簽約又係唔係一樣呢？想趁仲係三字頭闖吓，如果再簽約，再過幾年我係唔敢試。」他感激公司多年栽培，亦坦承為跳出安全網感到忐忑，他說：「都要計數，你問我驚唔驚，驚㗎！」近年被隊友陳健安及好友馮允謙（Jay）超前，問到釗峰離巢與曾是同唱片公司歌手之間的競爭可有關係，他說：「我無諗咁多，成功嘅公司，如果你配合到係天時地利人和，打橫瞓都會紅，啲歌都會OK，我真係無咁諗。」至於兄弟安仔有的成績，釗峰一直戥兄弟高興，又謂視Jay如弟弟，重視度比組合成員更高，他謂：「我哋係傾偈擔當，係大家嘅《情緒價值補給員》，會互相比意見。」

東網網站 : https://on.cc/東網Facebook專頁 : https://www.facebook.com/onccnews/