娛圈單打︱三個女人一個墟　四個是非一大堆

三個女人一個墟，咁四個女人走埋一齊，肯定唔止一個墟，直情是非一大堆！嗱，K-Pop頂流女團BLACK PINK，四條女近年各自單飛，Rosé遲來先上岸，原本係最沉一員，因為一首《APT.》時來運轉，成功打入美國市場，仲被《時代》雜誌選為年度百大影響力人物，係唯一打入榜嘅K-Pop女歌手，威過威士忌！

不過咁喎，四條女個個都要威，點可能畀一個威晒啫？早前佢哋完成巡唱洛杉磯站，Jennie喺IG上傳靚相，及後忽然刪去同Rosé嘅合照，只保留同Jisoo及Lisa嘅單獨合照。咁仲唔止，Jisoo上傳洛杉磯站照片時，同樣獨漏Rosé。只有Lisa最公平，上傳晒跟3名隊友嘅合照。

可能大家會話，一張相啫，使唔使諗咁多呀？部分Blink就唔覺得諗多咗囉，仲話Jennie明明已上傳有Rosé嘅合照，其後刪去，擺明唔妥到出面；仲言之鑿鑿話Jennie不滿公司偏心Rosé，詐晒型之餘，一於夥同Jisoo一齊玩杯葛。

女人心，海底針，同行如敵國，互相比較都不足為奇。你知啦，其中一人明明係全團最紅，忽然被隊友爬頭，心有戚戚然可以理解。何況Jennie、Rosé同Lisa，都將目光瞄準美國市場，如果話彼此間冇競爭心態，講都冇人信。

之但係，早前一樣傳出Jisoo英文太爛，無法打入國際市場，因而遭其餘三女排擠，可見傳聞一時一樣，毋須認真。為咗令不和傳聞降溫，Jennie特別喺多倫多站表明心迹，揚言「我哋非常深愛彼此」。所以啫，呢一局你贏，下一局我贏，打和就皆大歡喜啦！

東網網站 : https://on.cc/東網Facebook專頁 : https://www.facebook.com/onccnews/