【影評】《複製人徐福》：靚仔果然係大晒

更新於 2021年04月17日06:29 • 發布於 2021年04月17日06:29 • 肚臍大叔@SPILL

N 年未聽過的「電視大戰」再臨香江，上周日晚三色大台變陣搞 EYT 2.0 大戰生啤台口罩小姐總選，大叔就學志偉伯用米奇 tone 講句「打和啦」，無他，一邊無主題兼嚴重脫節，另一邊連節目 MC 講稿都寫唔好，結果是便便味咖喱和咖喱味便便，幸好電視內置大量串流 apps，跳船逃生十分方便。

但看看民情，大家都讀生啤台夠 guts 有創意⋯但有創意，也要執行得好好睇睇吧？再說，老婆近日多看生啤台，大叔就發覺幾乎所有節目都有 Mirror 和 Error 的身影，講藝員荒，生啤台比三色台嚴重得多吧？但無所謂，大家都會接受的，有姜濤、Ian、Lokman、Anson 等台柱嘛。仲唔夠？送多個肥仔同 193 畀你都仲得。唔識做戲？玩遊戲畀錯反應？唔緊要啦，就算演藝能力一般，但勝在樣子搭救嘛。

Your face your fate 是永恆真理，靚仔本無罪，某些情況下甚至可遮擋一切缺陷。所以說，生啤台至今最大成就，是培養了好一堆討得姐妹歡心的「可男兒」，滋潤枯渴 10 年以上的一眾港女。

喂喂，以上跟《複製人徐福》有乜關係？放心，大叔絕對不是呃字數搵食之人。

電影故事簡單講，佬味十足的特工孔劉，奉命保護極度 innocent 的不死超能複製人朴寶劍，周旋於大企業、韓國政府與美國政府之間的鬥爭，最後複製人失控，差點釀成大災難。劇本例牌韓式電影大堆頭樣樣有，特工一條主線，複製人一條主線，二人兄弟情又一條線，政府企業鬥爭又一條線，愛恨關係又開多一兩條副線，加加埋埋多過觀塘繞道總行車線。例牌多線，就當然例牌幾頭唔到岸。

如果專注一點的話，《複製人徐福》會好看得多。從徐福角度看生死觀、醫學道德、複製人的感情和社會地位、複製人對社會制度的衝擊等，再由孔劉這個第三者見證一切⋯但等等先，這種佈局豈不是變成文藝片？觀眾會悶的。

又調轉，不如來個全動作 treatment，由頭打到尾，超越《謊島叛變》（The Island），勁過《變種特攻》（X-Men），但偏偏韓國 CG 特技水平依舊與荷里活有所距離。而講 popcorn movie 的處理，從《屍殺半島》可見，韓國仍未有十足把握做好。

樣樣講少少的話，就必然要取捨和步調一致。之前還講兄弟情，去到最後竟然是《亞基拉》式超能力失控？那我該視被眾人爭奪的徐福，是如鐵雄一般的悲劇人物嗎？至少，觀感上令人覺得有《亞基拉》的身影。又少有地，今次韓國人不再痛罵美國這契哥，反將槍口指向超大型企業（即係三星？），不知道風雨飄遙的三星李氏，看罷有何感覺？

真正關於複製生物議題又精彩的，文藝一點有大悲劇《Never Let Me Go》，韓國導演奉俊昊的《玉子》聚焦命題又不失黑色幽默，Michael Bay 的《謊島叛變》亦有教材級的爆破技巧。

不太深刻的故事，加上令人聯想《亞基拉》的高潮戲碼，《複製人徐福》即使認真製作，最後難免令人覺得草草收場。但如之前所言，靚仔本無罪，還有孔劉和朴寶劍兩大男神，兩種定位滿足姐妹們不同需要，喜歡照顧小弟弟或鍾情滄桑型佬皆可。這樣何止無罪，直情攞滿分啦！